Naqty sektordy qoldaý kúsheıedi: «Báıterek» holdınginiń jańa mindetteri bekitildi
ASTANA. KAZINFORM — «Báıterek» Holdıngi jańa makroekonomıkalyq turaqtandyrý baǵdarlamasyn iske asyrýda negizgi rólge ıe bolmaq, dep habarlaıdy UEM baspasóz qyzmeti.
19 qarashada ótken Úkimet otyrysynda Úkimet, Ulttyq bank jáne Qarjy naryǵyn retteý jáne damytý agenttiginiń 2026-2028 jyldarǵa arnalǵan birlesken is-qımyldar baǵdarlamasy tanystyryldy. Qujat makroekonomıkalyq turaqtandyrýdy qamtamasyz etýge, ınflıatsııany tómendetýge, ishki óndiristi ulǵaıtýǵa jáne azamattardyń ál-aýqatynyń ornyqty ósýine baǵyttalǵan keshendi sharalardy aıqyndaıdy.
Baǵdarlamada «Báıterek» Holdıngine Úkimettiń ekonomıkalyq saıasatyn iske asyrýdaǵy negizgi quraldardyń biri retinde erekshe ról berildi. Investıtsııalar kólemin edáýir arttyrý qajettiligin eskere otyryp, Holdıng ekinshi deńgeıli banktermen birlesip, ınvestıtsııalyq jobalardy, jańa ekonomıkalyq ósý núktelerin jáne ekonomıkanyń basym salalaryn qoldaýǵa baǵyttalǵan kredıtterdi usyný arqyly naqty sektordy qarjylandyrýdyń negizgi kózine aınalady.
2026 jyly Úkimet «Báıterek» Holdıngin 1 trln teńgege kapıtaldandyrýdy jalǵastyrady. Bul Holdıngtiń ınvestıtsııalyq múmkindikterin keńeıtýge jáne óńdeý ónerkásibi men ınfraqurylym salalaryndaǵy basym jobalardy qoldaýǵa múmkindik beredi. Óz kezeginde Holdıng jyl saıyn qarjy naryǵynan syrtqy jáne ishki kózder esebinen shamamen 7 trln teńgege deıin qarajat tartatyn bolady.
Bıyl Holdıng memlekettik qoldaý kólemin 8 trln teńgege jetkizedi. Búgingi tańda «Báıterek» Holdıngi kásipkerlik sýbektilerine 5,7 trln teńge kóleminde qoldaý kórsetti. Onyń 1,7 trln teńgesi shamamen 9,6 myń ShOB jobasyn qarjylandyrýǵa, al 860,3 mlrd teńgesi 14 myń aýyl sharýashylyǵy taýar óndirýshisin qoldaýǵa baǵyttaldy. Nátıjesinde 29 myńǵa jýyq jańa jumys orny ashyldy. Bul sharalar ekonomıkanyń 1,3 paıyzdyq tarmaqqa ósýine múmkindik beredi.
Holdıng kredıtteý kólemin ulǵaıtady, bul bızneske aınalym qarajatyna da, ınvestıtsııalyq (uzaq merzimdi) kapıtalǵa da qoljetimdilikti arttyrýǵa múmkindik beredi.
Aldaǵy jyldary Holdıng proaktıvti ınvestıtsııalyq qyzmetke basymdyq beredi — joǵary ónimdi jańa kásiporyndar quratyn, eksportty ulǵaıtatyn jáne ımportqa táýeldilikti tómendetetin jobalardy qoldaýǵa nazar aýdarady. Nátıjesinde taý-ken metallýrgııa kesheni, mashına jasaý, munaı-gaz hımııasy jáne hımııa ónerkásibi, energetıka, týrızm jáne tamaq ónerkásibi sııaqty salalarda mýltıplıkatıvtik áseri eń joǵary 15–20 iri ınvestıtsııalyq jobalardyń toptamasy qalyptasady. Bul jobalar salalar men óńirlerdiń sapaly damýyna eleýli úles qosady.
Agroónerkásip kesheninde tereń óńdeý jobalaryn qarjylandyrý belsendiriledi. Bul AÓK-degi qaıta óńdelgen ónim úlesin 70%-ǵa deıin arttyrýǵa múmkindik beredi. Elimizde jyl saıyn AÓK óńdeý salasynda 100-den astam jańa ınvestıtsııalyq joba men óndiris iske qosylatyn bolady.
Investıtsııalyq qyzmetti kúsheıtý maqsatynda Holdıngte biryńǵaı ınvestıtsııalyq tereze qurylady — bul jobalardy bir jerde irikteýge, qurylymdaýǵa, ınvestorlardy tartýǵa, sondaı-aq tolyq súıemeldeý men oryndaý barysyn baqylaýdy qamtamasyz etýge múmkindik beretin tetik.
Sonymen qatar, Holdıng shaǵyn jáne orta bıznesti qoldaýdy jalǵastyrady jáne keńeıtedi. Bul úshin kredıtter boıynsha kepildikter tetigi belsendi paıdalanylady, al qarjylandyrý eń qajetti baǵyttarǵa baǵyttalady.
Importty almastyrý, otandyq óndirýshilerdi qoldaý, energetıka jáne kólik ınfraqurylymyn damytýǵa baǵyttalǵan jobalarǵa erekshe nazar aýdarylady. Mundaı jobalar óńirlerdiń qajettilikteri men erekshelikterin eskere otyryp, «ınvestıtsııalarǵa tapsyrys» tetigi arqyly iske asyrylatyn bolady.
— «Báıterek» Holdıngi eksporttyq áleýeti bar kompanııalarǵa birigip áreket etýge, jańa treıderler tabýǵa jáne óz ónimderin sheteldik naryqtarǵa shyǵarýyna qoldaý kórsetýdi kúsheıtedi. AÓK ónimderin syrtqy naryqtarǵa ilgeriletý úshin «ADAL» qory qurylady. Sondaı-aq Qazaqstannyń shekara mańyndaǵy naryqtardaǵy qatysýy keńeıtiledi. Bul Holdıng kompanııalarynyń qyzmetterin — mysaly, Otbasy bankiniń ıpotekalyq ónimderin — ilgeriletý sharalaryn qamtıdy. Qazaqstandyq óndirýshilerdiń sheteldik naryqtarda básekege qabilettiligin arttyrý úshin eksporttyq jobalardy shetel valıýtasynda qarjylandyrý múmkindigi kózdelgen. Bul bızneske syrtqy naryqtarda neǵurlym tıimdi sharttarmen jumys isteýge múmkindik beredi. Jańa jumys modeli «Báıterek» Holdınginiń ekonomıkanyń jedel jáne sapaly damýyna yqpalyn aıtarlyqtaı arttyrady. Jańartylǵan ınvestıtsııalyq saıasat Holdıngti eldiń ekonomıkalyq ósiminiń negizgi draıverleriniń birine aınaldyra túsedi, — delingen mınıstrlik habarlamasynda.
Budan buryn Úkimet otyrysynda makroekonomıkalyq turaqtandyrý jáne halyqtyń ál-aýqatyn arttyrý jónindegi birlesken is-qımyl baǵdarlamasyn tanystyrǵan Premer-mınıstrdiń orynbasary – Ulttyq ekonomıka mınıstri Serik Jumanǵarın ekonomıkalyq ósýdiń proaktıvti saıasatyn iske asyrý úshin «Báıterek» holdınginiń róli kúsheıtiletinin aıtty.