Naǵyz ushqyshtar tárizdi: Prezıdent Іs Basqarmasy balalarǵa «Búrkit» avıakompanııasyna ekskýrsııa uıymdastyrdy
Balalar ushqysh formasyn kıip kórip, áýe kompanııasy qyzmetkerleriniń qyzyqty oqıǵalaryn estip, memleketimizdiń joǵary laýazymdy tulǵalary ushatyn áýe kemelerimen tanysty.
Ushý angarynda «Challenger-850», «IL-76» - eki áýe laıneri jáne «Eurocopter-225» tikushaǵy boldy. Ekskýrsııa bastalar aldynda balalarǵa qaýipsizdik sharasyn saqtaýdyń mańyzdylyǵy aıtyldy.
Aıta keteıik, «Búrkit» memlekettik áýe kompanııasy 2000 jyly 18 mamyrda qurylǵan. Ol asa mańyzdy reısterdi oryndaıdy. Avıakompanııanyń ushaqtary Memleket basshysy men Úkimet múshelerin tasymaldaıdy. «Búrkit» elorda áýejaıynyń aýmaǵynda ornalasqan.
Kásibı ushqyshtar jas qonaqtarǵa áýe kemelerin kórsetip, avıatsııa týraly qyzyqty málimetterimen jáne estelikterimen bólisti. Balalarǵa pılottyń ornyna otyryp, júk ushaǵynyń ishindegi qurylǵylardy ustap kórýge ruqsat etildi. Mundaı múmkindik buıyrǵan baldyrǵandardyń qýanyshynda shek bolmady.
«Bıyl bizdiń elimizde Balalar jyly atalyp ótýde. Osyǵan oraı Prezıdent Іs Basqarmasymen birlese otyryp, qyzmetkerlerdiń balalaryna ekskýrsııa ótkizýdi jón kórdik. Menińshe, bul shara balalar úshin óte qyzyqty. Qazir Qazaqstanda ǵana emes, búkil álemde ushqyshtar men avıatsııa salasynyń mamandary tapshy. Bizdiń ekskýrsııadan keıin mektep oqýshylary arasynan osy salaǵa qyzyǵýshylyq tanytyp, bolashaǵyn avıatsııamen baılanystyrýdy maqsat etetinder bolady dep senemin», - dedi «Búrkit» áýe kompanııasynyń dırektory Erkebulan Ospanov.
Aldymen oqýshylar Qazaqstan aýmaǵynda jáne shet memleketterge mańyzdy úkimettik reısterdi oryndaıtyn «Challenger-850» ushaǵymen tanysty.
«Al «Eurocopter-225» tikushaǵymen memleketimizdiń birinshi basshysy ushady. Ushaq qona almaıtyn, kólik óte almaıtyn eldiń kez kelgen jerine osy tikushaqpen jetýge bolady», - dep túsindirdi ınjener Sergeı Tolchenko.
Al úlken «IL-76» ushaǵy – júkter men kólikterdi tasymaldaýǵa arnalǵan. Qaýipsizdik ınspektsııasynyń bastyǵy Vıktor Tımofeevtiń aıtýynsha, bul júk tasymalymen aınalasatyn eń senimdi ushaq. Onyń qanatynyń uzyndyǵyn fýtbol alańynyń aýmaǵymen salystyrýǵa bolady. Áýe kemesi kez kelgen ushyp-qoný jolaǵyna, sonyń ishinde muz ústine de qonýǵa qaýqarly. Pandemııa kezinde bul ushaq Qytaıdan dári-dármek pen medıtsınalyq qural-jabdyqtardy tasymaldaǵan.
Ekskýrsııaǵa qatysýshylar arasynda bolashaq ushqysh – Nurasyl Baqytjan da bar. Ol qazir 6-synypta oqıdy. Nurasyl kishkentaı kezinen áýe kemelerine qyzyǵýshylyq tanytyp keledi.
«Bala kezimnen ushqysh bolýdy armandaımyn. Anam «ekskýrsııa bolady, onda ushaqtardy kóresiń» degende qatty qýandym. Men birden ekskýrsııaǵa qatysýǵa nıet bildirdim. Ushaqtar maǵan qatty unaıdy. Tipti olardyń kollektsııasyn jınaımyn. Ushqysh bolý úshin shydamdylyq, matematıka jáne aǵylshyn tilin bilý, isińe zeıin salý, týyndaǵan máselelerdi jedel sheshe bilý kerek dep oılaımyn», - dedi Nurasyl Baqytjan.
5-synyp oqýshysy Ǵazız Serikbaı da ekskýrsııadan alǵan áserimen bólisti. Ol arnaıy maqsattaǵy jasaqta qyzmet etýdi, sonymen qosa ushaqty basqaryp úırenýdi armandaıdy.
«Maǵan kabına qatty unady. Ondaǵy eń mańyzdy batyrma qandaı ekenin ildim. Prezıdenttiń ózi ushqan jáne túrli áskerı mindetterdi oryndaı alatyn ushaqtyń ishinde boldym. Bolashaqta arnaıy jasaqtyń qyzmetkeri bolǵym keledi. Sebebi olarǵa páter beriledi, kóp jalaqy alady jáne jalpy – bul jaqsy jumys. Olarda kóp zeńbirek pen kıimder bar jáne olar asa mańyzdy mıssııalardy oryndaýǵa barady», - dep armanymen bólisti Ǵazız Serikbaı.
Ushqysh, áýe kemesiniń komandıri Beıseken Moldabaev «Búrkit» áýe kompanııasynda ozyq tehnologııalar qoldanylatynyn jáne munda eń sońǵy úlgidegi zamanaýı ushaqtar bar ekenin atap ótti.
«Biz 100 paıyz ushý qaýipsizdigin qamtamasyz etemiz. Óıtkeni, mańyzdy memlekettik tapsyrystardy oryndaımyz. Eger kóp avıakompanııalardyń ushaqtary syrtta turatyn bolsa, bizdiń ushaqtar árqashan angarlarda bolady. Bul óz kezeginde tehnıkalyq qyzmet kórsetetin ınjenerlerge de yńǵaıly. Kishkentaı uldar óte belsendi. Olar ushaqtyń jabdyqtalýyna qyzyǵýshylyq tanytyp, batyrmalarmen jumys isteýdi qalaı úırenýge bolatynyn surady. Ekskýrsııa balalardan bólek, ózimizge de unady. Bálkim aralarynda bolashaq áriptesterimiz de bar shyǵar», - deıdi Beıseken Moldabaev.
Tanymdyq saıahat sońynda balalarǵa avıatsııa taqyryby boıynsha vıktorınalyq suraqtar qoıyldy. Qonaqtar saýaldardy muqııat tyńdap, Prezıdent Іs Basqarmasynyń qyzmetkerleri daıyndaǵan júldelerdi jeńip alý úshin birinshi bolyp jaýap berýge tyrysty.
Sondaı-aq avıakompanııa ujymy atynan árbir oqýshyǵa «Búrkit» ataýymen shokoladtar tabys etildi.
Aıta keteıik, Prezıdent Іs Basqarmasy bıylǵy Balalar jyly aıasynda budan ózge de sharalardy ótkizýde. Máselen, buǵan deıin PІB qyzmetkerleri sýret salýdan baıqaý uıymdastyryp, jeńimpazdarǵa qomaqty syılyqtar tabystady. Sondaı-aq Ulttyq mýzeı men ALJIR memorıaldyq murajaıyna saıahat jasap, erekshe kútimdi qajet etetin balalarǵa arnap Býrabaıda ekskýrsııa ótkizdi. Mundaı sharalardy uıymdastyrýǵa QR PІB Avtokólik basqarmasy da belsene qatysady.
Buǵan qosa, taıaýda Astana qalasynda QR Prezıdenti Іs Basqarmasynyń kýlınarlary men aspazdary qıyn jaǵdaıǵa tap bolǵan balalardy qoldaý ortalyǵyna baryp, 60 tárbıelenýshige merekelik dastarhan jaıyp, baıqaý men sheberlik saǵatyn ótkizgen edi.
