Naǵyz ofıtserdi tárbıelegenińiz úshin rahmet: Serik Kúdebaev qaza tapqan polıtseıdiń anasymen sóılesti
TALDYQORǴAN. QazAqparat - Búgin áleýmettik jeli arqyly halyqpen onlaın kezdesken Almaty oblysy polıtsııa departamentiniń bastyǵy, polıtsııa general-maıory Serik Kúdebaevqa qyzmet barysynda qaza tapqan polıtsııa polkovnıgi Aıdyn Asqarbaevtyń anasy qońyraý shaldy, dep habarlaıdy QazAqparat tilshisi.
Almaty oblystyq polıtsııa departamenti baspasóz qyzmetiniń málimetinshe, bir qylmystyq istiń tergelýine qatysty habarlasqan qart anaǵa kóńil aıtqan bas polıtseı «óz isiniń kásibı sheberi, naǵyz patrıot» bala tárbıelegeni úshin alǵysyn jetkizdi.
«Polıtsııa polkovnıgi Aıdyn Asqarbaev bilikti maman bolatyn. Ártúrli bólimshelerde basshylyq qyzmette bolǵan ol úzdik nátıjelerge qol jetkizýshi edi. Ókinishke qaraı, qyzmet babynda kólik apatynan qaıtys boldy. Biz ony umytpaımyz, qurmet tutamyz!»,- dedi Almaty oblysy polıtsııa departamentiniń bastyǵy, polıtsııa general-maıory Serik Kúdebaev.
Esterińizge sala keteıik, Alakól aýdany polıtsııa bóliminiń bastyǵy Aıdyn Asqarbaev 2016 jyly kólik apatynan qaıtys bolǵan.
Onyń jarqyn beınesin esten shyǵarmaǵan áriptesteri onyń joldasy Úmitke bıyl «Ofıtser jubaıy» medalin taqqan.
Qyzmetin atqarý kezinde qaıtys bolǵan polıtseılerdiń otbasyna polıtsııa departamentiniń tarapynan únemi kóńil bólinetinin atap ótý qajet.
Tikeleı efırde tildesken soń polıtsııa basshysy keıýananyń máselesin óz baqylaýyna alatynyn aıtyp, qolastyndaǵylarǵa tapsyrma berdi.
