Naǵyz kóshbasshy bolý úshin tek qana talantty bolý az, negizinen halyqtyń senimi qajet - QR Tuńǵysh Prezıdenti murajaıy dırektorynyń orynbasary
ASTANA. Sáýirdiń 20-sy. QazAqparat /Marlan Jıembaı/ - Naǵyz kóshbasshy bolý úshin tek qana talantty bolý az, negizinen halyqtyń senimi qajet.
Bul pikirdi QR Tuńǵysh Prezıdenti murajaıynda ótken «Otbasynda, mektepte jáne basqa áleýmettik ınstıtýttarda lıderlik qasıetterdi qalyptasyrý» pikirtalas sabaǵy barysynda atalǵan mekeme dırektorynyń orynbasary Botagóz Qaıypova bildirdi.
Búgingi pikirtalastyń aıaq astynan týyndamaǵanyn atap ótken onyń sózine qaraǵanda, murajaı 2009 jyldan bastap otbasynda, mektepte jáne ártúrli ınstıtýttarda lıderlik qasıetterdiń qalyptasýyn tirek etken ǵylymı jobany júzege asyrýda. Bul jobany júzege asyrý barysynda Elbasynyń kishi otanyna jasalǵan ǵylymı-zertteý is-saparyn da aıaqtaǵan. Sonymen qatar murajaı ǵylymı konferentsııalar, ártúrli sabaqtar, kezdesýler, pikirsaıystardyń turaqty ótip turýyna da muryndyq bolyp keledi.
«Naǵyz kóshbasshy bolý úshin tek qana talantty bolý az, negizinen halqynyń senimi qajet. Sondyqtan qazirgi jasóspirimderimizdiń óz salasynyń, mekemesiniń, qatarynyń lıderi, tulǵasy bolýǵa laıyqty qasıetterin qalyptastyrý úshin osyndaı sharalarǵa tartyp otyramyz.
Sharaǵa «Jas ulan» respýblıkalyq mektebiniń tárbıelenýshileri de qatysýda. Olar el jastarynyń áskerı bolashaǵy. Sondyqtan jastar patrıottyqqa, otansúıgishtikke sana-sezimin tárbıelemeı táýelsizdigimizdi, osy kúnge deıingi elimizdiń jetistikterin jáne óziniń jarqyn joldy bolashaǵyna senim bildire almaıdy», dedi B.Qaıypova.
Tulǵanyń lıderlik qasıetteriniń damýyna yqpal etetin faktorlardy anyqtaýmaqsatynda ótken pikirtalas sabaǵy barysynda taraptar lıder bolý týa bite me, álde tájirıbe arqasynda qalyptasa ma degen saýalǵa jaýap izdeýge tyrysty. Jalpy onyń qorytyndysy boıynsha naqty pikirge kelý qıyn. Degenmen ár azamat óz salasynda kóshbasshysy bolýy ne bolmasa bilikti mamany bolýy tabıǵı talantpen qatar zor eńbektiń, zeıinniń, yntanyń arqasynda ǵana qol jetkizetindigi anyq.
Atalǵan sharaǵa «Jas ulan» respýblıkalyq mektebiniń tárbıelenýshileri, №51 orta mektep oqýshylary, elorda mektepteriniń tarıh pániniń ustazdary, Bilim basqarmasynyń, «Nur Otan» HDP «Jas Otan» jastar qanatynyń ókilderi qatysty.
