Naǵyz qazaq halqyna ǵana tán ulttyq sporttyń kóptegen túrleri buqaralyq sıpatqa ıe bola almaı otyr
ASTANA. 29 aqpan. QazAqparat - Naǵyz qazaq halqyna ǵana tán ulttyq sporttyń kóptegen túrleri buqaralyq sıpatqa ıe bola almaı otyr. Búgin QR Parlamenti Májilisiniń jalpy otyrysynda depýtat Jambyl Ahmetbekov osy máseleni kóterdi.
«Respýblıkamyzda ulttyq sport túrlerin nasıhattaý jáne damytý maqsatynda jyl saıyn san alýan sport túrlerinen, atap aıtsaq, «alaman báıge», «kókpar», «qunan báıge», «jorǵa jarys» sekildi at sporty túrlerinen, qazaqsha kúresten jáne basqa da kóptegen ártúrli jarystar ótkizilip turady. Sporttyń bul túrleri elimizde jaqsy damyp, qarqyn alyp keledi, keıbir sport túrleri elimizdiń sheńberinen shyǵyp halyqaralyq dárejede ótkizilip júrgeni kóńilge qýanysh uıalatady. Alaıda, ulttyq sporttyń kóptegen túrleri, atap aıtsaq búrkit, ıtelgi, qarshyǵa sekildi qyran qustardy baptaıtyn qusbegilik, qansonarda tazy baptap ańǵa salý sekildi naǵyz qazaq halqyna ǵana tán ulttyq ónerimiz buqaralyq sıpatqa ıe bola alǵan joq. Al kóneden jetken sport túrleri «atan jarys», «qamshygerlik saıys» sekildi sport túrleri elge tanys emes, buqara halyq olar týraly bilmeıdi deýge de bolady», - deıdi depýtat.
Onyń paıymynsha, qazaqtyń ulttyq sport túrleriniń bári, jastardyń dene qýatynyń artyp, rýhanı nyǵaıýyna áser etedi. Adamdy jigerlilikke baýlıdy, tól tarıhyna, qazaq halqynyń salt-dástúrine qurmetin týǵyzady. Bul jaǵdaı ásirese, qazirgi jappaı jahandaný kezinde onyń mánin odan ári arttyra túsedi.
«Ókinishke qaraı, qazirgi kúni ulttyq sport túrlerin damytýǵa memleket tarapynan jetkilikti dárejede nazar aýdarylmaı kele jatqanyn da aıta ketýmiz kerek. Onyń birqatar sebepteri de bar. Atap aıtsaq, materıaldyq-tehnıkalyq bazasynyń álsizdigi, oqytý baǵdarlamalarynyń, oqý-ádistemelik materıaldarynyń azdyǵy jáne jattyqtyrýshylardyń, tóreshilerdiń jáne basqa da qyzmetkerleriniń, ıaǵnı kadrlardyń biliktiligin arttyrý jáne olardy daıarlaý júıesiniń tómendigi buǵan tusaý. Qazirgi kúni bizdiń elimizde ulttyq sport túrleri boıynsha mamandar, tóreshiler daıarlaıtyn oqý orny da, fakýltet te joq, sondyqtan da osy saladaǵy kadr máselesi óte ótkir tur. Osy sebepterge baılanysty ulttyq sport túrlerin damytý úshin arnaıy zań qabyldaýymyz qajet dep oılaımyz», - deıdi J. Ahmetbekov. Osy rette depýtat bıýdjetten ulttyq sport túrlerine bólinetin qarajat kózderin 2012 jylǵa 3 paıyzǵa kóterip, 2017 jylǵa 20 paıyzǵa deıin arttyrý qajettigin atap ótti.
