Naǵyz damyǵan el bolamyz desek, saıası reformalarmen shektelip qalmaýymyz kerek – Prezıdent

ASTANA. QazAqparat – Saıası reformalardy túbegeıli jáne jan-jaqty áleýmettik-ekonomıkalyq reformaǵa ushtastyrý qajet. Bul týraly Parlament palatalarynyń birlesken otyrysynda Qazaqstan halqyna Joldaýyn jarııalaǵan Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Ózderińizge málim, byltyrdan beri elimizde aýqymdy saıası jańǵyrý jumystary júrgizildi. Nebári bir jarym jyldyń ishinde kóptegen ózgeris jasaldy. Oǵan barshańyz kýá boldyńyzdar, reformany júzege asyrý úshin belsendi túrde jumys istedińizder. Qolǵa alǵan sharalar nátıjesinde bılik tarmaqtary arasynda tıimdi tepe-teńdik ornady. Basqarý júıesi yqpaldy Parlamenti bar Prezıdenttik respýblıka úlgisine kóshti. Elimizde «kúshti Prezıdent – yqpaldy Parlament – esep beretin Úkimet» tujyrymdamasy barynsha ornyqty. «Halyq únine qulaq asatyn memleket» qaǵıdatyn naqty iske asyrýymyz qajet. Bul jerde Parlamenttiń róli erekshe», - dedi Qasym-Jomart Toqaev.

Memleket basshysynyń atap ótýinshe, adam quqyǵyn qorǵaý salasynda mańyzdy qadamdar jasaldy. Ádildikti jáne zań ústemdigin ornatý úshin aýqymdy jumys júrgizilip jatyr. Sheshim qabyldaý úderisine azamattardyń qatysý múmkindigi artty. Qoǵamnyń saıası mádenıeti múlde jańa sıpatqa ıe boldy.

«Alaıda naǵyz damyǵan el bolamyz desek, saıası reformalarmen shektelip qalmaýymyz kerek. Osy jumysty túbegeıli jáne jan-jaqty áleýmettik-ekonomıkalyq reformaǵa ushtastyrý qajet», - dedi Prezıdent.