Naǵyz stalker iz qaldyrmaıdy — depýtat zańdaǵy olqylyqtardy atady
ASTANA. KAZINFORM — Qazaqstanda stalkıngke qatysty jańa zań normalaryn qoldaný kezinde dálel jınaý men quqyqtyq baǵalaý máseleleri týyndaýy múmkin. Bul týraly Májiliste ótken dóńgelek ústelde depýtat Baqytjan Bazarbek málimdedi.
Onyń sózinshe, stalkıngke qatysty isterde eń kúrdeli máselelerdiń biri — dálel jınaý.
— Naǵyz stalker artynan iz qaldyrmaıdy. Ol óz áreketterin jasyrýǵa tyrysady. Sondyqtan erteń stalkıngten zardap shekken adamdardyń óz quqyqtaryn sotta dáleldeýi qıyn bolýy múmkin, — dedi depýtat.
Baqytjan Bazarbektiń aıtýynsha, stalkıń faktilerin rastaıtyn beınejazba, kýáger nemese ózge de dálelder árdaıym bola bermeıdi. Al kóptegen jaǵdaıda adamdar quqyq qorǵaý organdaryna nemese sotqa kýáger retinde qatysýdan bas tartady.
Sondaı-aq depýtat stalkıngtiń belgilerin quqyqtyq turǵydan naqtylaýdyń mańyzdylyǵyna toqtaldy.
— Biz eń aldymen adamnyń erkinen tys júrgiziletin baqylaý men qýdalaýdyń belgilerin naqtylaýymyz kerek. Ekinshiden, mundaı áreketter júıeli sıpatqa ıe bolýy tıis. Úshinshiden, jábirlenýshige keltirilgen eleýli zııan máselesin anyqtaý qajet, — dedi ol.
Depýtattyń pikirinshe, psıhologııalyq qysymnyń saldaryn baǵalaý da kúrdeli másele. Óıtkeni adamnyń kúızelisi nemese psıhologııalyq jaısyzdyǵy qandaı jaǵdaıda eleýli zııan retinde tanylatyny naqty aıqyndalýy qajet.
Sonymen qatar ol Májiliste qaralyp jatqan jeke detektıvtik qyzmet týraly zań jobasy men stalkıngke qatysty normalardyń ara-jigin de naqtylaý qajettigin aıtty.
— Zańdardy qoldaný kezinde qaı áreket zańdy aqparat jınaý bolyp sanalatynyn, al qaısysy stalkıng retinde baǵalanatynyn naqty ajyratýymyz kerek. Bul azamattardyń quqyqtaryn qorǵaý úshin mańyzdy, — dedi Baqytjan Bazarbek.
Eske sala keteıik, 2025 jyldyń 16 qyrkúıeginde stalkıng úshin úshin qylmystyq jaýapkershiliktiń engizilgen edi.
