Naǵashybaı Muqatov - lırık aqyn
N. Muqatov Qostanaı oblysy, Jangeldın aýdanyna qarasty, Torǵaı selosynda 1949 jyly 14 naýryz kúni dúnıege kelgen.
Ol eńbek jolyn Jangeldın aýdandyq «Jańa ómir» gazetinen bastaǵan. Sol kezderi aýdandyq, oblystyq aqyndar aıtysyna birneshe márte qatysyp, jeńimpaz atanǵan.
Naǵashybaı Muqatov - Almaty qalasyndaǵy Ál-Farabı atyndaǵy qazaq ulttyq ýnıversıteti jýrnalıstıka fakýltetiniń túlegi. Ol Qazaqstan radıosy jáne teledıdary salasynda 40 jylǵa jýyq qyzmet jasady. Baıyrǵy Torǵaı, Qostanaı oblystyq radıolary redaktsııasynda jýrnalıstik qyzmet atqarǵan. Qostanaı oblystyq teleradıo kompanııasynda qazaq redaktsııasyn, «Shańyraq» shyǵarmashylyq birlestigin basqarǵan. Respýblıkalyq teledıdar habarlary festıvalinde úsh márte júldeger atandy.
Aqyn búgingi tańda Qostanaı qalasynda turady. Oblys ortalyǵyndaǵy buqaralyq sıpattaǵy mádenı sharalarǵa belsendi túrde aralasady. Ol jylda ótetin oqýshylardyń oblystyq «Jas tulpar» aıtysynyń, Muqaǵalı Maqataev atyndaǵy baıqaýdyń turaqty ádilqazylar alqasynyń múshesi. Qostanaıdaǵy aımaqtyq aıtysty júrgizýshi retinde de tanymal. Mártebege ıe qazaq tiliniń taǵdyry jaıly radıo, teledıdardan jıi sóıleıdi, baspasózge únemi materıaldar jazyp turady. Oblystyq til oqytý ortalyǵy tyńdaýshylaryna dáris beredi.
Qostanaı oblystyq Y.Altynsarın memorıaldyq murajaıynyń dırektory bolyp 7 jyl qyzmet istedi. Qazir A.Baıtursynov atyndaǵy Qostanaı memlekettik ýnıversıtetiniń jýrnalıstıka bóliminde dáris beredi.
Naǵashybaı Muqatov lırık aqyn retinde tanymal. Ol qazaq radıosy uıymdastyrǵan «Qazaqstanym - qara shańyraǵym» atty tuńǵysh respýblıkalyq radıo festıvaliniń bas júldesin jeńip aldy.
Aqyn «Sóıle, júrek», «Aınalaıyn adamdar», «Aq bulaq», «Janymnyń jasyl japyraqtary» óleńder jınaǵynyń avtory. Sondaı-aq «Oı otaýda ońasha», «Kókirek kózben kórgenderim» (oı-tolǵamdar), «Beısenbaı bıik báıterek» (derekti áńgime), «Qanat jáne Qalamqas», «Bekzat aǵa, Sanjar ini» (balalarǵa arnalǵan óleńder), «Kúlkim keledi» (satıralyq ıntermedııalar), «Qazynaly Qaınekeı» (ǵylymı monografııa) dep atalatyn kitaptary jaryq kórgen. Qalamger kórnekti aqyn, ádebıetshi, aýdarmashy, qoǵam qaıratkeri, qazaq poezııasyna oqıǵaly óleńdi (ballada) ornyqtyryp, jetildirýshi Qaınekeı Jarmaǵanbetovtiń ádebı baı murasynan kandıdattyq dıssertatsııa qorǵaǵan.
Naǵashybaı Muqatov «Keńes odaǵy teledıdary men radıosy qyzmetiniń úzdigi» belgisimen, Astananyń 10 jyldyq merekelik medalimen marapattalǵan. Ol - Qazaqstan Respýblıkanyń mádenıet qaıratkeri. Qostanaı oblystyq metsenattar klýby taǵaıyndaǵan «Qazyna» syılyǵynyń eki márte ıegeri.