Nadejda Rıabets pen Mahmud Sabyrhan álem kýbogynyń fınalynda baq synaıdy

ASTANA. KAZINFORM - Astanada ótip jatqan World Boxing aıasyndaǵy álem kýbogynda búgin Qazaqstan quramasy sapynan taǵy eki boksshy fınalǵa joldama aldy.

Aldymen Nadejda Rıabets (75 keli) jartylaı fınalda túrkııalyq Býsra Isıldarmen qolǵap túıistirdi. Onyń qarsylasy - 2025 jylǵy álem chempıonatynyń kúmis júldegeri bolǵan tájirıbeli boksshy.

Úsh raýndtyń qorytyndysy boıynsha otandasymyz túrkııalyq boksshyny 4:1 esebimen jeńip, fınalǵa shyqty. Odan keıin Mahmud Sabyrhan (55 kelide) jartylaı fınalda Bolgarııa ókili ıAsen Radevqa úsh raýnd boıy esh múmkindik bermedi. Esep - 5:0.

Al el quramasynan Ertýǵan Zeınýllınov (65 keli) úndistandyq Abhınash Jamvalǵa jol berip, qola medaldi qanaǵat tutty.

Endi Qazaqstan sapynan Sabyrjan Aqqalyqov (75 keli) pen Aıbek Oralbaı (90 keliden joǵary) sharshy alańǵa shyǵady. 

Aıta ketsek, qazirge deıin Alýa Balqybekova (51 keli), Nurbek Oralbaı (80 keli), Nazym Qyzaıbaı (48 keli), Vıktorııa Grafeeva (60 keli), Natalıa Bogdanova (70 keli), Sanjar Táshkenbaı (50 keli), Bekzad Nurdáýletov (85 keli) altyn júldeni sarapqa salýǵa múmkindik aldy. 

Buǵan deıin qazaqstandyq qos boksshy Aıdana Zabynbekova (57 keli) men Aıda Ábikeeva (65 keli) elordadaǵy álem kýbogynyń qola júldesin enshilegenin jazǵan edik.