Nadejda Dýbovıtskaıa bıiktikke sekirýden Jazǵy ýnıversıadada tórtinshi oryn aldy
ASTANA. QazAqparat - Qazaqstandyq sportshy Nadejda Dýbovıtskaıa Qytaıdyń Chendý qalasynda ótip jatqan HHHІ Jazǵy ýnıversıadada bıiktikke sekirýden tórtinshi oryn aldy, dep habarlaıdy QazAqparat tilshisi.
Nadejda Dýbovıtskaıa bıiktikke sekirý saıysynyń fınalynda tórtinshi oryn aldy. Kórsetkishi - 1,84 metr.
Bul jarysta Ganadan kelgen 22-jastaǵy Roýz Ieboa 1,94 metrdi baǵyndyryp, úzdik nátıje arqyly sensatsııalyq túrde chempıondyq ataqqa qol jetkizdi.
Ekinshi oryndy kıprlik jeńil atlet Elena Kýlıchenko (1,91 metr) alsa, úzdik úshtikti Fınlıandııa sportshysy Venla Pýlkanen (1,88 metr) túıindedi.
Qazir Qazaqstan quramasynyń enshisinde 20 júlde bar. Onyń ishinde 2-ýi altyn, 7-ýi kúmis, 11-i qola.
Medaldar kestesinde 20-orynda keledi. Kósh basynda 150 júldemen (82-35-33) Qytaı quramasy keledi. Odan keıingi oryndardaǵy Japonııa 75 (19-25-31), Ońtústik Koreıa 50 (17-15-18) medali bar.
Jazǵy ýnıversıada 8 tamyzda máresine jetedi.
Eske salsaq, Ádilbek Mýsın Jazǵy ýnıversıadada qola júlde aldy.
