Nadal 12-márte «Rolan Garros» týrnıriniń jeńimpazy atandy
NUR-SULTAN. QazAqparat - Ispanııalyq tennısshi Rafael Nadal 12-inshi ret «Rolan Garros» týrnıriniń jeńimpazy atandy, dep habarlaıdy QazAqparat tilshisi.
Osy jarystyń ekinshi raketkasy bolyp tirkelgen R.Nadal Parıjdegi fınalda dúnıejúzilik reıtıngte 4-orynda turǵan aýstrııalyq Domınık Tımmen bas júldeni sarapqa saldy.
Ispanııalyq sportshy qarsylasyn 6:3, 5:7, 6:1, 6:1 esebimen utty.
Báseke 3 saǵat 1 mınýtqa sozyldy.
Ótken jylǵy fınalda da qos tennısshi kezdesip, Nadal 6:4, 6:3, 6:2 esebimen jeńiske jetken edi.
Osylaısha R.Nadal alǵashqy bolyp tennıs tarıhynda 12-inshi ret «Rolan Garros» jarysynda úzdik shyǵyp otyr. Bul jóninen oǵan teńesetin eshkim joq. Nadal topyraq tósenishinde ótetin «Rolan Garrostyń» absolıýtti rekordshysy bolyp esepteledi.
Sonymen qatar R.Nadal «Úlken dýlyǵa» týrnırlerindegi 18-inshi tabysyna qol jetkizdi. Bul jóninen ol shveıtsarııalyq Rodjer Federerge jaqyndaı tústi. Onyń enshisinde 20 tıtýl bar. Álemniń 1-raketkasy, serbııalyq Novak Djokovıch úshinshi orynda tur, ol «Úlken dýlyǵa» týrnırlerin 15 márte utyp aldy.
Bıylǵy «Rolan Garros» týrnıri qazaqstandyqtar úshin onsha sátti bola qoıǵan joq. Mıhaıl Kýkýshkın bastapqy kezdesýinde-aq utylyp qalsa, Aleksandr Býblık ekinshi aınalymda dál osy D.Tımge ese jiberdi.
Áıelder arasynda ıÝlııa Pýtıntseva men Elena Rybakına birinshi, Zarına Dııas ekinshi aınalymnan asa almady.
Áıelder arasynda «Rolan Garros» týrnırin aýstralııalyq, álemniń 8-raketkasy Eshlı Bartı utty. Ol fınalda 19 jasar chehııalyq Marketa Vondroýshovany tize búktirdi. Bul - E.Bartıdiń «Úlken dýlyǵa» týrnırindegi birinshi tabysy. Endi ol dúısenbide jańartylatyn reıtıngte ekinshi orynǵa kóteriledi.
Qazirgi kezde tennısshiler taǵy bir «Úlken dýlyǵa» týrnıri - Ýımbldon jarysyna ázirlikti bastap ketti. Mysaly, Qazaqstannyń birinshi, álemniń 51-raketkasy Mıhaıl Kýkýshkın Hertogenbos (Nıderlandy) týrnıriniń alǵashqy aınalymynda reıtıngte 74-satyda turǵan ıtalııalyq Lorentso Sonegomen kortqa shyǵady.
Taǵy bir qazaqstandyq Aleksandr Býblık Shtýtgart (Germanııa) týrnıriniń irikteý saıysyna qatysýda.
Eske sala keteıik, budan buryn Elena Rybakınanyń Hertogenbosta negizgi týrnırge joldama alǵanyn jazǵan bolatynbyz.
