N.Jantórın atyndaǵy Atyraý oblystyq fılarmonııasy Syr eline keldi
QYZYLORDA. QazAqparat - Búgin Qyzylorda oblysynyń Óńirlik kommýnıkatsııalar qyzmetinde Atyraý oblystyq fılarmonııasynyń qurylǵanyna 50 jyl tolýyna oraı N. Jantórın atyndaǵy Atyraý oblystyq fılarmonııasynyń dırektory Ǵadil Dúısenǵalıev, «Naryn» halyq aspaptar orkestriniń bas dırıjeri, kórkemdik jetekshisi Erjan Kıtarov jáne fılarmonııa ánshisi, QR Mádenıet qaıratkeri Hanzada Saqypovanyń qatysýymen BAQ ókilderine arnalǵan baspasóz - konferentsııasy ótti. Bul týraly oblystyq ishki saıasat basqarmasynyń baspasóz qyzmeti habarlady.
Sondaı-aq, osy kúni Qyzylorda qalasynda, Qazaqstan Respýblıkasy Táýelsizdiginiń 25 jyldyǵy men fılarmonııanyń 50 jyldyǵyna oraı, «Naryn» ult-aspaptar orkestri gostroldik kontsert beredi.
Atyraý oblystyq fılarmonııasy men Oral, Aqtóbe, Qyzylorda, Shymkent jáne Almaty oblystyq fılarmonııalary birlestiginiń shyǵarmashylyq jáne gostroldik yntymaqtastyǵymen, shyǵarmashylyq tájirıbe almasýdyń, Qazaqstan mádenıetiniń mýzykalyq murasy men dástúrlerin saqtaýdyń, álemdik jáne otandyq mýzyka jaýharlaryn dáripteýdiń negizi bolyp tabylatyndyqtan, orkestrler, dırıjerler, jeke oryndaýshylar men vokalıster jáne aspapshylardyń birlesken kontsertteri, aımaqtyq oryndaýshylyq mektepterdiń kontsertterin ótkizý jolymen yntymaqtastyq múmkinshilikteri tájirıbe almasýdy keńeıtýge jáne Qazaqstanda fılarmonııalar birlestiginiń mańyzdy shyǵarmashylyq bazasyn qurýǵa múmkindik beredi.
Atyraý oblystyq Nurmuhan Jantórın atyndaǵy fılarmonııasynyń qurylǵanyna 50 jyl tolýyna oraı «Naryn» ult-aspaptar orkestriniń kontsertteri 2016 jylǵy 31 naýryzda Oral qalasynda, 1 sáýirde Aqtóbe oblysynyń Alǵa aýdanynda, 2 sáýir kúni Aqtóbe qalasynda, 4 sáýir kúni Qyzylorda qalasynda, 5 sáýir kúni Shymkent qalasynda, 7 sáýir kúni Almaty qalasynda ótkiziletin bolady.
