N.Zarýdnaıa: «Abaıdyń qara sózderi, bul - «Ar-namys kodeksi»
ASTANA. 27 maýsym. QazAqparat - Sybaılas jemqorlyqqa qarsy kúreste, eń aldymen, azamattardyń boıyndaǵy ádildik, ınabattylyq sııaqty moraldyq qasıetterdi barynsha damytý qajet.
Búgin Ekonomıkalyq qylmys jáne sybaılas jemqorlyqqa qarsy kúres agenttiginde ótken jıynda EQYU-nyń Astanadaǵy ortalyǵynyń dırektory Natalıa Zarýdnaıa osy máseleni erekshe atap ótti.
Osy oraıda ol qazaq halqynyń danyshpany Abaı Qunanbaıulynyń «Keseldi jalqaý, qyljaqbas, Ázir tamaq, ázir as. Syrtyń - pysyq, ishiń - nas, Artyn oılap uıalmas» degen sózin mysalǵa keltirip: «Qazir de Abaı sózderiniń mańyzy zor. Sebebi búginde jemqorlyq halyqty jegideı jep, eldiń damýyna aıtarlyqtaı nuqsan keltirip otyr. Abaıdyń qara sózderi aforızm ǵana emes, bul - «Ar-namys kodeksi», - dedi.
Al jýrnalısterdiń: «Siz ózińiz Abaıdy oqydyńyz ba?» degen saýalyna N.Zarýdnaıa: «Soǵys jyldary meniń ákem Qazaqstan jerinde boldy. Sondyqtan men Abaı týraly bilip óstim. Áli esimde, úıde «Abaı joly» romany jatty. Ony men mektepte júrip, oqyp shyqqanmyn. Odan keıin aqynnyń «Qara sózderine» úńildim. Sol kezde aıtylǵannyń bári qazirdiń ózinde de ózekti ekendigin jete túsinip otyrmyn», - dep jaýap berdi.
