Nıý-Iorktiń eń úzdik polıtseıi Dımash Nııazbekov týǵan jeri Qazyǵurtta boldy - OQO

Ózge elde júrse de qazaqı qasıetinen aıyrylmaǵan tártip saqshysyna aýdan turǵyndary erekshe  qurmet kórsetti, dep habarlaıdy QazAqparat  tilshisi.
 

Aýdandyq mádenıet úıinde ótken kezdesýde sportshy polıtseı jastardyń suraǵyna jaýap berdi. Ózi týraly baıandap ketti. Dımashtyń sózinshe, ol Shymkent qalasynda dúnıege kelgenimen, ákesi Ismattyń týyp ósken jeri - Qazyǵurt aýdanynyń  Atbulaq aýyly.  13 jasynda ata-anasy otbasymen muhıt asyp, shetelde ómir súrýge sheshim qabyldaıdy. Amerıkadaǵy alǵashqy jyldar jerlesimizge ońaı soqpaǵan. Degenmen, ómirge degen qushtarlyq, jeńiske umtylýdyń arqasynda 2 jyldyń ishinde aǵylshyn tilin tolyq meńgerdi. Keıin polıtsııa akademııasyna túsip, tártip saqshysy atandy. Qysqa ýaqyt ishinde úlgili jumysynyń arqasynda aldyńǵy qatarly polıtseı atanyp úlgerdi. Byltyr esirtki satatyn qylmystyq toptyń serkesin quryqtap, Nıý-Iork qalasynyń 2017 jylǵy úzdik polıtseıi atandy. Dımash Nııazov Los-Andjeleste  Nurlan Qoıaanbaevtyń usynysymen «Bıznes po-Kazaxskı v Amerıke» kınosynyń túsirilimine de  qatysqan.  Sonymen qatar, ol kásipqoı bokspen aınalysady. Búginge deıin  13 kezdesý ótkizip, barlyǵynda jeńimpaz bolǵan. Kezdesý barysynda polıtseı jas boksshylarǵa sheberlikti shyńdaý sabaǵyn da ótti.
 

«Kezdesý maǵan  óte qyzyqty jaǵymdy áser qaldyrdy. Ásirese jastardyń sportqa qushtarlyǵy meni qýantty. Kóbisi aǵylshyn tilin biledi eken. Bul óte quptarlyq jaǵdaı. Sebebi álemdik qarym qatynas tili bolǵandyqtan osy tildi bilgen jaqsy. Qazyǵurt aýyly kishkentaı bolǵanymen munda bolashaqta eldiń atyn shyǵaryp namysyn qoldaıtyn talantty jastar kóp eken. Olar óz maqsatyna jetetinine senimdimin. Amerıkada qazaqtar kóp, degenmen mundaǵydaı birin biri jaqsy qoldaı bermeıdi»,- deıdi AQSh polıtseıi.

Muhıttyń arǵy jaǵynan ata mekenin ańsap kelgen Dımash Nııazovqa  qazyǵurttyqtar qamshy ustatty. Týǵan jerdiń sazy esinen shyqpasyn dep dombyra syılady. Abyz aqsaqal Isa Telikbaev aq batasyn berdi.