Nıý-Iorktiń beldi gazeti Trampqa úsh sózden turatyn maqala arnady
ASTANA. QazAqparat - The New York Times gazeti AQSh Prezıdenti Donald Tramptyń Twitter mıkroblogyndaǵy belsendiligine maqala arnady, dep habarlaıdy QazAqparat Reseı jańalyqtar agenttigine silteme jasap.
Atap óterligi, maqala mátini úsh-aq sózden turdy.
"Toqta. Jaı ǵana toqta", - delingen onda.
Gazettiń bul sózderi Amerıka prezıdentiniń MSNBC telearnasyndaǵy Morning Joe tańǵy baǵdarlamasynyń júrgizýshilerimen eregisine jaýapty reaktsııa boldy. Atap aıtqanda, arna júrgizýshileri Mıka Bjezınskı men Djo Skarboro AQSh prezıdentiniń atyna syn aıtqan. Osydan keıin Tramp eki jýrnalıske til tıgizip, Twitter-de Bjezınskıdi «IQ-i tómen esi aýysqan», al onyń áriptesin - «esalań» dep atady.
Prezıdent sondaı-aq eki júrgizýshi de oǵan Jańa jylǵa qonaqqa kelýge suranǵanyn, al Bjezınskıdiń beti sol kezde plastıkalyq otadan keıin qantalap turǵanyn atap ótken.
Amerıkalyq saıasatkerler Tramptyń sózin nazarsyz qaldyrmady jáne júrgizýshilerge qarsy mundaı áreketin synǵa aldy.
Budan buryn saýalnama nátıjesi amerıkalyqtar Tramptyń Twitter-degi jeke akkaýnty buǵattalǵanyn qalaıtynyn kórsetken bolatyn.
