Nıý-Iorktegi taksı júrgizýshileriniń 96 paıyzy - mıgranttar
ASTANA. QazAqparat - Nıý-Iorktegi taksı júrgizýshileriniń 96 paıyzy - kelimsekter. Olardyń kópshiligi aǵylshyn tilin jetik bilmeıdi. Osyǵan deıin taksıdiń róline otyrý úshin júrgizýshiler aǵylshyn tilin qanshalyqty meńgergendigi týraly test tapsyratyn. Endi Nıý-Iork meri Bıll De Blazıo ımmıgranttarǵa jumysqa ornalasý ońtaıly bolý úshin bul emtıhandy zańdy túrde alyp tastady, dep jazady 24.kz.
Taksı júrgizýshileri buǵan qýanyshty, al jolaýshylar oǵan kerisinshe narazy. Óıtkeni tildi jetik bilmegendikten, taksı júrgizýshileri dittegen jerge jetkize almaı jatady. Tipti bul jerde elektrondy navıgator da kómektese almaıdy.
Búginde Nıý-Iorkte 144 myń taksı júrizýshisi jumys isteıdi. Olardyń kópshiligi ıspan tilinen basqa tildi bilmeıdi. Sondaı-aq myńdaǵan sary tústi taksıdiń rólinde otyrǵandar - Ońtústik Azııadan kelgender.
Degenmen qalalyq ákimshilik ókilderi taksı júrgizýshileri úshin aǵylshyn tilin jetik meńgerý mindetti emes deıdi. Máselen, Uber júrgizýshileri aǵylshyn tilinen test eshqashan tapsyrmaǵan. Biraq jumystaryna ol esh kedergi keltirmepti. Jolaýshylar da azaımaǵan.
- Bul - taksı júrgizýshilerine berilgen múmkindik. Biz osylaısha orta taptyń qataryna qosyla alamyz. Bul úshin osy joldaǵy kedergilerdi joıýymyz qajet, deıdi Nıý-Iork qalalyq keńesiniń múshesi Ýdanıs Rodrıges.
