Nıý-Iorktegi Nıkolaı Rerıh mýzeıiniń jaýharlary Astanaǵa jetkizildi

ASTANA. QazAqparat  - Qazaqstanda tuńǵysh ret aty ańyzǵa aınalǵan sýretshi, fılosof,saıahatshy jáne arheolog Nıkolaı Rerıhtiń shyǵarmashylyq jumystarynyń kórmesi uıymdastyryldy, dep habarlaıdy «QazAqparat» HAA tilshisi.

Kórme EKSPO-2017 aıasynda QR Ulttyq mýzeıinde ótip jatyr.

 «Shambalany izdeý jolynda: Nıý-Iorktegi Nıkolaı Rerıh mýzeıiniń jaýharlary» atty kartınalar kórmesinde sýretshiniń jastyq shaǵynda jáne 1920-1940 jyldary salynǵan 37 týyndysy qoıylǵan.

Atap ótken jón, Nıkolaı Rerıh óte kóp saıahattaǵan, onyń júzdegen jumysy Ortalyq Azııa ekspedıtsııasynda  Qytaı Túrkistanynda, Mońǵolııada, Úndistanda jáne Tıbet pen Altaıda salynǵan.

1926 jyly Rerıh ekspedıtsııasy Shyǵys Qazaqstanǵa, ári qaraı Óskemen, Semeı, Pavlodar jáne Ombyǵa barǵan.

«Bul kórme Qazaqstan men AQSh-tyń óner tili deńgeıindegi dıalogy. Biz Qazaqstanǵa EKSPO-2017 kórmesin ótkizý kúnderi kelip otyrmyz. Rerıh bolashaqtyń energııasy ónerde jatyr dep esepteıtin», - dedi Orys-Amerıkalyq Qorynyń prezıdenti, amerıkalyq «Son Mar Group» kompanııasynyń negizin qalaǵan, Brýklın memlekettik murajaıynyń eks-kýratory Marına Kovaleva. 

Kórmeniń saltanatty ashylý rásimine QR Ulttyq qaýipsizdik komıtetiniń tóraǵasy Kárim Másimov qatysty.

Kórme QR Mádenıet jáne sport mınıstrliginiń tapsyrysymen jáne BUU-nyń Qazaqstan Respýblıkasyndaǵy Mıssııasy men Qazaqstan jáne AQSh Elshilikteriniń resmı qoldaýymen ótýde.