Nıý-Iorktegi qazaqstandyq-amerıkalyq sán kórsetilimi asa tartymdy ótti
Qazaqstandyq dızaınerler óz toptamalaryn Nıý-Iorktiń belgili bıkeshteri men sándi kıim úlgileriniń sarapshylaryna usynyp, yqylasqa bólendi. Qazaqtyń dástúrine saı biregeı úlgi men amerıkalyq dızaınerlerdiń týyndylary Fashion show-da erekshe úılesim tapty. Dúıim jurttyń kóńilinen shyqqan shara Nıý-Iorktiń BUU ǵımarattarynyń birinde ótti, dep habarlaıdy 24.kz.
«Symbat» sán akademııasy álemdi 1972 jyldan bastap tańdaı qaqtyryp júrse, amerıkalyq áriptester bul bastamany endi ǵana qolǵa alǵan. Qazaqstandyq sán úıiniń art-dırektory Balnur Asanova kópshilik nazaryna túrli toqymadan tigilgen keste men ózindik ereksheligi bar jibek jeıdelerdi usyndy.
«Meni Qazaqstannyń «Symbat» sán akademııasy dızaınerleriniń jumysy tań qaldyrdy. Keıbiri múlde kózdiń jaýyn alady. Munda ár nársege erekshe kóńil bólingendigi anyq baıqalady. Qazaqstannyń sán úlgisi bizge erekshe lep berdi»,-deıdi, Fashion for Development kompanııasynyń prezıdenti Ivı Evangeloý.
Nıý-Iork dızaıneri Valentına Kova atalǵan kórsetilimniń kórigin odan saıyn qyzdyra tústi. Onyń qolynan shyqqan kıimderdi Hılları Klınton, ataqty aktrısa Djýllıana Mýr, «Oskar» jeńimpazdary syndy aıtýly tulǵalar tutynady. Sondaı-aq avtor osy joly zergerlik buıymdaryn da ala kelgen. Onyń áshekeılerin ekranǵa endi ǵana shyǵatyn «Betmen sýpermenge qarsy» jańa kórkem fılminiń keıipkerlerinen kóre alasyzdar. Baǵdarlama aıasynda jas ánshi Altynaı Saparǵalıeva Qazaqstandy ár qyrynan tanytýǵa ózindik úlesin qosty.
«Sán úlgisi óte keremet ótti. Qazaqstan týraly kórkem fılm meni erekshe baýrap aldy. Ánshilerińiz Altynaı da qatty unady. Biz Qazaqstan týraly biraz nárseni bildik, elderińizge qazir ushyp barýǵa daıynmyn»,-deıdi isker áıel Sheron Býsh.
