Nıý-Iorktegi qazaq polıtseıi óziniń jumysy týraly aıtty
«AQSh-ta polıtseı qyzmetkerleri óte tanymal jáne erekshe qurmetke ıe. Degenmen jumys ońaı emes, Nıý-Iorktiń ózinde resmı 15 mln halyq turady, al resmı emes derekterge súıensek 19 mln adamǵa deıin barady. Nıý-Iorkte jalpy sany 35 myń polıtsııa qyzmetkeri bar. Onyń 60-65% patrýldik qyzmet atqarady. Aptasyna 5 kún, kúnine 8,5 saǵat jumys isteımiz. Ásirese 2020 jyl polıtseıler úshin aýyr jyl boldy. Ózderińiz biletindeı, ótken jyly Nıý-Iorkte keń kólemdegi qarsylyq aktsııalary men mıtıngter jıi boldy. Sáıkesinshe biz kúsheıtilgen rejımde jumys istedik», - dedi D. Nııaz QR Sybaılas jemqorlyqqa qarsy is-qımyl agenttiginiń uıymdastyrýymen onlaın ótken baspasóz máslıhatynda.
Sondaı-aq, jerlesimizge AQSh polıtseıleri para alady ma jáne qanshalyqty jıi usynady degen suraq qoıyldy.
«Jasyratyny joq, AQSh-ta da polıtseılerge para usynady. Biraq, munda tártip pen zań qatal jáne polıtseı para alýdyń arty jaqsylyqqa ákelmeıtinin jaqsy túsinedi. Para alǵanyń úshin kez-kelgen sátte jumysyńnan aırylyp qalýyń múmkin. Sondaı-aq, bizde barlyq jerde beınebaqylaý kamerasy ornatylǵan, ıaǵnı bizdiń de turǵyndardyń da árbir qadamy beınejazbaǵa túsiriledi. Demek saǵan para bergen ýaqytta syrttan kimniń túsirip turǵanyn bilmeısiń. Maǵan jumys kezinde aqsha usynǵandar boldy. Men ondaı sátte zańǵa súıenemin de bolmaıtynyn túsindirip aıtamyn. Keıde tártip saqshysy retinde azamattarǵa kómektesken sátte, olar óz rızashylyǵyn bildirip aqsha usynyp jatady. Ol para emes, jaı ǵana alǵys, soǵan qaramastan biz bas tartamyz. Bul bizdiń kásibı etıka bolyp sanalady», - deıdi ol.
Onyń aıtýynsha, Amerıkada polıtseı qyzmetkerine talap qatań jáne olarǵa tolyqtaı áleýmettik jaǵdaı jasalǵan. Bul tártip saqshylarynyń sybaılas jemqorlyq áreketter jasamaýynyń negizgi sebebi.
Aıta ketsek, buǵan deıin habarlaǵanymyzdaı AQSh-taǵy jerlesimiz jýyrda bokstan jekpe-jek ótkizetinin aıtty.
Odan bólek, D. Nııazov qazaq jáne amerıkan tártip saqshylary arasynda boks keshin uıymdastyrý ıdeıasyn usyndy.