Nıý-Iorktegi burynǵy egiz munaraǵa jaqyn jerde meshit salynady
ASTANA. Mamyrdyń 7-si. QazAqparat - Nıý-Iorktegi 2001 jyly qyrkúıektiń 11-indegi lańkestiktiń saldarynan jermen-jeksen bolǵan Dúnıejúzilik saýda ortalyǵynyń egiz munarasyna jaqyn jerde úlken meshiti bar ıslamdyq mádenı ortalyǵy paıda bolady.
Qala ókimetiniń habarlaýynsha, bul sheshim Manhettenniń osy aýdanynda turatyn musylmandar úshin salynyp otyr. Bıiktigi 13 qabatqa jetetin meshit 2001 jylǵy lańkestik kezinde zaqymdanǵan nysanǵa oryn tebetin bolady. Manhettende musylman meshiti men mádenı ortalyǵyn qurý jobasy 100 mıllıon dollarǵa baǵalanyp otyr.
Degenmen, qyrkúıektiń 11-indegi lańkestiktiń saldarynan qaza tapqandardyń týystary men jaqyndary bul josparǵa qynjylystaryn bildirip otyrǵan kórinedi. Osyǵan oraı Amerıka musylmandarynyń qoǵamy málimdeme jasap, atalmysh jobany júzege asyrý «Batys pen ıslam áleminiń arasyndaǵy qarym-qatynasty jaqsartýǵa múmkindik beretinin» aıtyp otyr.
