Nıý-Iorktegi Bas konsýldyq amerıkalyqtar asyrap alǵan qazaqstandyq balalardy merekemen quttyqtady
ASTANA. QazAqparat - 1 maýsym - Halyqaralyq balalardy qorǵaý kúni qarsańynda Nıý-Iorkte Qazaqstannyń Bas konsýldyǵy «Qazaqstan-Amerıka alıansymen» birlese otyryp, amerıkalyqtar asyrap alǵan qazaqstandyq balalardy quttyqtady. Bul týraly QR Syrtqy ister mınıstrliginiń baspasóz qyzmetinen habarlandy.
Saltanatty sharany ashý barysynda Bas konsýl Raýshan Esbolatova balalar kúni merekesiniń tarıhy týraly áńgimelep berdi. Onyń aıtýynsha, Halyqaralyq balalardy qorǵaý kúni 1949 jyly qarasha aıynda Parıjde Áıelderdiń halyqaralyq demokratııalyq federatsııasy tarapynan bekitilgen. Osylaısha, mereke alǵash ret 1950 jyly atalyp ótildi.
Budan bólek, Bas konsýl balalardy quttyqtaı kele, bundaı merekeniń AQSh-ta turyp jatqan qazaqstandyq balalar úshin ózderiniń mádenı, rýhanı tildik erekshelikterin umytpaýǵa zor septigin tıgizetinin atap ótti.
«Bas konsýldyq AQSh-ta asyrap alynǵan balalarǵa, olardyń tirshilik ortasyna erekshe nazar aýdarady. Bul rette konsýldyq jyl saıyn dástúrli túrde ótip turatyn «Kazapalooza» sharasyna qatysyp keledi. Osy alańda qazaqstandyq balalardy asyrap alǵan amerıkalyq otbasylardyń basym bóligi bas qosatyny belgili», - dedi ol.
Óz kezeginde bala asyrap alǵan ata-analar júzdegen qonaqtardyń basyn qosqan sharaǵa shynaıy alǵystaryn jetkizip, onyń balalarǵa jaǵymdy áser beretinin alǵa tartty. Qonaqtar men balalar osy kúni qazaqtyń ulttyq ashanasynan dám tatyp, ulttyq oıyndar oınady.
