Nıý-Iorkte júzdegen adam polıtseılerdiń zorlyq-zombylyǵyna qarsy narazylyq sharasyna shyqty
ASTANA. QazAqparat - Sársenbi kúni Nıý-Iorkte júzdegen adam polıtseılerdiń azamattarǵa qarsy zorlyq-zombylyǵyna qarsy narazylyq sharasyna shyqty, dep habarlaıdy Assoshıeıted Press agenttigi.
Sherýshilerdiń kóbi polıtseılerdiń qolynan qaza tapqan Erık Garner men Ýolter Skotty eske alý úshin shyqqan.
Aktsııa Manhettenniń Union Square alańynda bastalyp, keıin halyqtyń úlken toby Brýklın kópiri arqyly ótip, ondaǵy kólik qozǵalysyna jarym-jartylaı kedergi keltirdi. Aktsııanyń uıymdastyrýshylary osyndaı narazylyq sharalarynyń AQSh-tyń 28 aýdanynda ótkenin málimdedi.
Sońǵy ýaqytta AQSh-ta qara násildi amerıkalyqtardyń polıtseılerdiń qolynan qaza tabý oqıǵalary kóbeıgen. Amerıka jurtshylyǵyn, atap aıtqanda, Nıý-Iork qalasynda ustalǵan kezde býyndyryp óltirilgen afroamerıkalyq Erık Garner men Mıssýrı shtatynda polıtseılerdiń oǵynan qaza tapqan Maıkl Braýnnyń ólimderi dúrliktirdi.
Polıtseılerdiń qatysýymen bolǵan sońǵy janjal sáýir aıynda Ońtústik Karolına shtatyndaǵy Charlstonda boldy. Onda polıtsııa qyzmetkeri Maıkl Sledjer qarýsyz jergilikti 50 jastaǵy Ýolter Skottyń arqasyna 8 ret oq atqan. Ǵalamtorda paıda bolǵan beınejazbada qara násildi er adamnyń arqasyna oq atqan polıtseıden qashyp bara jatqany kórinip tur.
