Nıý-Iorkte tórt áıeldi óltirgen kúdikti 10 jyldan keıin pıtstsadaǵy DNQ arqyly tabyldy

ASTANA. QazAqparat – AQSh bıligi ondaǵan jyl buryn Nıý-Iorkke jaqyn mańda bolǵan jappaı kisi óliminiń qupııasy ashylýǵa jaqyn ekenin málimdedi, dep habarlaıdy QazAqparat VVS-ge silteme jasap.

2010-2011 jyldary Long Aılend aralynyń ońtústik jaǵalaýyndaǵy Gılgo Bıch jaǵajaıynan 11 adamnyń máıiti tabylǵan. Olardyń kóbi jas áıelder edi.

Uzaq jyldarǵa sozylǵan tergeýden keıin juma kúni jergilikti prokýratýra negizgi kúdikti – Nıý Iorkte turatyn Reks Hoıermann esimdi 59 jastaǵy arhıtektor ustalǵanyn habarlady.

Polıtsııa ol jegen pıtstsadan DNQ alǵan.

Ol qurbandardyń birinen tabylǵan úlgimen sáıkes keletini belgili boldy. Sodan keıin kúdikti tutqynǵa alyndy.

Hoıermannǵa úsh áıeldiń ólimi boıynsha birden birinshi jáne ekinshi dárejeli kisi óltirý aıyby taǵyldy.

Olar – 2009 jyly óltirilgen Melısa Bartelemı, 2010 jyly óltirilgen Megan Ýoterman men Ember Kostello.

Sonymen qatar, Hoıermann 2007 jyly joǵalyp ketken taǵy bir áıel - Morın Breınard Barnstyń óliminde negizgi kúdikti sanalady.

Bul tórt áıel baspasózde «Gılgo tórttigi» degen atpen tanymal.

Olardyń súıekteri 2010 jyldyń jeltoqsanynda kezdeısoq, sol jyldyń mamyrynda joǵalyp ketken 23 jastaǵy Shennen Gılbertti izdeý kezinde tabyldy.