Nıý-Iorkte ótetin qazaqstandyq boksshynyń jekpe-jegi tikeleı efırde kórsetiledi

NUR-SULTAN. QazAqparat – 22 sáýirden 23 sáýirge qaraǵan túni qazaqstandyq boksshy Bobyrjan Momynov (12-0, 8 KO) Nıý-Iorkte (AQSh) «Naızaǵaı» degen laqap aty bar meksıkalyq Anhel Rýıspen (16-1, 12 KO) jekpe-jek ótkizedi, dep habarlaıdy QazAqparat Sports.kz-ke silteme jasap.

Boks keshiniń tikeleı kórsetilimi Nur-Sultan ýaqytymen 04:30-da bastalady jáne myna jerden kórýge bolady.

Momynov óziniń sońǵy jekpe-jegin ótken jyldyń qyrkúıeginde ótkizdi. Ol kezde sýdıalardyń kópshiliginiń sheshimimen reseılik Vagınak Tamrazıandy jeńgen bolatyn (17-8, 5 KO). Rýıske keletin bolsaq, ol 2019 jyldyń qazan aıynan bastap rıngke shyqpady. Sol jyly ol profıde birinshi ret jeńiliske ushyrady: ekinshi raýndta Pýerto-Rıko boksshysy Haver Flores (15-3, 13 KO) nokaýtqa túsirgen edi.

Anhel Rýıstiń áıgili tálimger Mennı Roblestiń basshylyǵymen jattyǵatynyn aıta ketken jón. Tálimger burynǵy aýyr salmaqtaǵy álem chempıony Endı Rýıspen birge jumys istegen.

Eske salsaq, Bobyrjan Momynovtyń qarsylasy ózgergen bolatyn.