Nıý-Iorkte Memleket basshysy Polsha Prezıdentimen kelissóz júrgizdi
BUU Bas Assambleıasynyń 74-shi sessııasy alańynda Qasym-Jomart Toqaev Polsha Prezıdenti Andjeı Dýdamen ekijaqty kelissózder júrgizdi.
Kezdesý barysynda memleketter kóshbasshylary ekijaqty yntymaqtastyqtyń perspektıvalary, sonyń ishinde, Eýropalyq Odaq sheńberindegi qarym-qatynas máselesi talqylady.
Qasym-Jomart Toqaev Nıý-Iorktegi BUU Bas assambleıasy sessııasynyń aıasyndaǵy joǵary deńgeıdegi Qazaqstan-Polsha kezdesýleri ıgi dástúrge aınalǵanyn atap ótti. Qasym-Jomart Toqaev Andjeı Dýdanyń 2015 jyly qyrkúıek aıynda Qazaqstannyń Tuńǵysh Prezıdenti Nursultan Nazarbaevpen tanysqanyn, sondaı-aq, Polsha kóshbasshysynyń 2018 jyldyń qańtar aıynda Elbasymen birge BUU Qaýipsizdik Keńesiniń taqyryptyq brıfıngine qatysqanyn mysalǵa keltirdi.
Memleket basshysy Nur-Sultan men Varshava arasyndaǵy dostyq jáne ózara tıimdi qarym-qatynastardy odan ári nyǵaıtýǵa daıyn ekenin atap ótip, Qazaqstan men Polsha arasyndaǵy baılanystardyń bekı túskenin aıtty.
«2018 jyly elderimizdiń arasyndaǵy eki jaqty taýar aınalymy 1,2 mlrd dollardy qurady. Qazaqstanda Polshanyń 100-den astam kompanııasy belsendi jumys isteýde. Bizdiń qarym-qatynastarymyzdyń damýyna Qazaqstannyń Polsha azamattary úshin vızalyq rejımdi alyp tastaýy, sondaı-aq, 2017 jyly Nur-Sultan men Varshava arasynda tikeleı áýe qatynasynyń iske qosylǵany eleýli úles qosty», – dedi Qasym-Jomart Toqaev.
Sonymen qatar, Qasym-Jomart Toqaev Andjeı Dýdaǵa Qazaqstanda Ulttyq qoǵamdyq senim keńesi qurylǵanyn aıtty. Dál osyndaı qurylym Polsha Prezıdentiniń basshylyǵymen bul memlekette de jumys isteıdi.
