Nıý-Iorkte Qazaqstannyń ınvestıtsııalyq múmkindikteri tanystyryldy
Basqosýǵa qarjylyq jáne bank qyzmetteri, konsaltıng, qurylys, jyljymaıtyn múlik, aqyldy qalalardy damytý, ІT jáne ózge de salalarda qyzmet atqaratyn iri jáne orta kompanııalardyń ókilderi qatysty.
Nıý-Iorktegi Bas konsýly Jánibek Ábdirashov qatysýshylarǵa ınvestıtsııa tartýdaǵy tyń ádisterimiz jáne ınvestorlarmen jumys isteıtin aımaqtyq habǵa aınalatyn «Astana» halyqaralyq qarjy ortalyǵy jóninde baıandady. Ótken jyly Qazaqstanǵa quıylǵan ınvestıtsııa mólsheri 15,8 protsentke artyp, 24 mıllıard dollarǵa jetken.
«Amerıka bıznesi jaǵynan qyzyǵýshylyq bar, bul tusta Qazaqstanda jaqsy mehanızm qurylǵany mańyzdy. Úılestirýshi Keńes ınvestorlardyń elimizde týyndaǵan bar máselelerin sheshýmen aınalysady. Osyndaǵy bizdiń maqsatymyz tek iri bıznesti ǵana emes, ınvestıtsııalyq múmkindikteri bar orta jáne shaǵyn bıznesti baǵyttaý bolyp tur. Olar qarajatyn ózge elderge salyp júr, óıtkeni Amerıka - keń naryq, al Nıý-Iork - álem deńgeıindegi nómir birinshi qarjy ortalyǵy. Munda óte kóp kompanııalar bar»,-dedi QR Nıý-Iorktegi bas konsýly.
