Nıý-Iorkte Qazaqstannnyń turaqty damýyna arnalǵan saıası forým ótip jatyr
Turaqty damý jónindegi saıası forým (JDSF) aıasynda ótkizilgen qosymsha is-shara BUUDB men Qazaqstannyń strategııalyq áriptestigine arnalyp transformatsııalyq bastamalarǵa, teńsizdikterdi joıýǵa, ınstıtýttardy jańǵyrtýǵa jáne tómen kómirtekti damýǵa járdemdesýge septigin tıgizgen jemisti yntymaqtastyqty atap ótti.
Qosymsha is-sharada Qazaqstan men BUUDB arasyndaǵy yntymaqtastyqtyń jańa kezeńi retinde elge TDM-ǵa jetýge kómektesýge baǵyttalǵan BUUDB-nyń 2021-2025 jyldarǵa arnalǵan Eldik baǵdarlamasyn birlesip qarjylandyrý tetigi usynyldy.
«Biz Birikken Ulttar Uıymynyń Damý baǵdarlamasymen berik áriptestigimizdi joǵary baǵalaımyz. Bul jańa tetik óńirlerdi jáne Qazaqstan Úkimetiniń basym jáne uzaqmerzimdi reformalaryn qoldaý úshin qajetti jobalar pýlyn jáne tehnıkalyq kómek aýqymyn qalyptastyrýǵa múmkindik beredi. Bólingen qarajat Abaı, Ulytaý jáne Jetisý oblystaryn qosa alǵandaǵy el óńirlerin damytý úshin, ekonomıkanyń «jasyl» sektorlaryn ilgeriletý úshin jáne Qazaqstandaǵy keleshek ınstıtýtsıonaldyq reformalardy qoldaý úshin paıdalanylatyn bolady», – dedi Ulttyq ekonomıka mınıstri Álibek Qýantyrov.
Іs-shara sheńberinde sondaı-aq osy áriptestiktiń flagmandyq bastamasy – tıimdi qyzmet kórsetýdi jáne vedomstvoaralyq úılestirýdi qamtamasyz etetin búkil úkimettik tásil arqyly teńsizdik máselelerin sheshýge arnalǵan ınnovatsııalyq platforma – Otbasynyń tsıfrlyq kartasy usynyldy.
«Inklıýzıvti tsıfrlyq qoǵamdyq ınfraqurylymdy qurý teńsizdikti azaıtý, memlekettik basqarýdy jaqsartý jáne qoǵamdyq senimdi qaıtarýdy qosa alǵanda, TDM-ǵa jetýdegi progreske yqpal ete alady. BUUDB dúnıe júzindegi úkimetterge tsıfrlyq tehnologııalardyń transformatsııalyq kúshin paıdalanýǵa kómektesý qurmetine ıe jáne Qazaqstan mundaǵy aıryqsha úlgi bolyp sanalady.
Búgin usynylǵan Otbasynyń tsıfrlyq kartasy tehnologııalar, áriptestik pen kóregen kóshbasshylyq úılesiminiń mysaly bola otyryp, sansyz muqtaj adamnyń ómirindegi ózgeristerge alyp keledi. Ol ınklıýzıvti damý men áleýmettik progreske jetý jolyndaǵy mańyzdy qadamnyń kórinisi jáne eshkimniń shette qalmaýyn qamtamasyz etedi», – dedi BUU Bas hatshysynyń kómekshisi, BUUDB ákimshisiniń kómekshisi jáne Eýropa jáne TMD elderi boıynsha BUUDB aımaqtyq bıýrosynyń dırektory Ivana Jıvkovıch.
Іs-sharaǵa qazaqstandyq jáne sheteldik úkimetterdiń, BUU agenttikteriniń, donorlardyń, BAQ pen ǵylymı qaýymdastyqtyń ókilderi qatysty.
Jylda ótetin saıası forýmda (JDSF) bıyl «Koronavırýs aýrýynan (COVID-19) keıin qalpyna keltirýdi jedeldetý jáne barlyq deńgeıde 2030 jylǵa deıingi turaqty damý salasyndaǵy kún tártibin tolyq iske asyrý» taqyrybynda Nıý-Iorkte 10-19 shilde aralyǵynda ótedi.
Basty nazar 2030 jylǵa deıingi kezeńge arnalǵan jahandyq damý kún tártibi men TDM 17-ge (Turaqty damý múddelerindegi áriptestik) aýdarylady.
