Nıý-Iorkte qazaqstandyq «Nomad» klýby ashyldy
ASTANA. QazAqparat - Nobel syılyǵynyń 30 laýreaty men Oskar júldesiniń 19 ıegeri bilim alǵan Nıý-Iork ýnıversıtetinde Qazaqstannyń tarıhymen tanysýǵa bolady, dep jazady Habar 24.
1831 jyly ashylǵan Nıý-Iork ýnıversıtetinde álemniń ár qıyrynan kelgen 50 myń stýdent bilim alady. Olar elimizdiń Nomad klýbynyń ashylý saltanatynyń kýási boldy. Sheteldik stýdentter endi osy jerde Uly dalanyń óneri men mádenıeti jáne salt-dástúrimen tanysady.
Salatanatty sharada qazaqtyń myń buralǵan bıshileri óner kórsetip, kórermenderdi tánti etti.
«Bul klýb tek ǵanaqazaqstandyq stýdentterdiń bir-birimen aralasýy emes jáne de Qazaqstannyń mádenıeti, Qazaqstannyń dástúri jáne de Qazaqstannyń tabıǵaty men tamaǵy týraly bilý úshin qurylǵan klýb»,- dedi «Nomad» klýbynyń prezıdenti Darhan Muńaıtpasov.
Qonaqtar kitap kórmesin aralap, elimizdiń kórikti jerlerimen tanysyp, ulttyq taǵamdarymyzdan dám tatty.
«Bilim ordasynan shyqpaı-aq, Qazaqstanǵa saıahattaǵandaı boldyq»,- deıdi olar.
Shara barysynda «Go-Nomads» jobasynyń tusaýy kesildi. Bul bastama kez-kelgen adamǵa elimizge sapar jasap, Qazaqstannyń qalaǵan aımaǵynda aǵylshyn tilin úıretýge múmkindik beredi.
«Nomad» klýbynyń ashylýy keremet ótti! Qazaq mádenıetiniń túrli tustaryn kórip, qazaqstandyqtar óz elin maqtan tutatynyna kózim jetti», - deıdi stýdent Fıl Opaola.
Naǵyz qazaq - qazaq emes, naǵyz qazaq - dombyra. Keshke kelgen qonaqtar kúmbirlegen aspaptan qazaqtyń áýezdi áýenderin tyńdady. Sharaǵa kelgen dıplomatarymyz da klýbqa qoldaý kórsetip, bolashaqta osy jerde elimizdiń mádenıetin dáripteıtin maǵynaly keshter uıymdastyrýdy usyndy.
«Darhan men Aınur qazaqstandyq stýdentter tobyn jınap, osy klýbty ashty. Bul týrızmmen qatar túrli salalarda baılanystardy damytýǵa jol ashady. Osyndaı uıym ýnıversıtette alǵash ret qurylyp otyr. Bul platforma ýnıversıtet ınfraqurylymynyń negizinde qazaqstandyq sharalardy ótkizýge múmkindik beredi», - deıdi Qazaqstannyń Nıý-Iorktegi bas konsýly Jánibek Ábdirashev.
Nıý-Iork ýnıversıteti «Nomad» klýbyna qazaq tilin oqytýǵa arnalǵan arnaıy aýdıtorııalar bóldi. Qazirdiń ózinde keı sheteldik stýdentter tilimizdi meńgerýge nıet bildirgen.
