Nıý-Iorkte Birikken Ulttar Uıymynyń 75-shi Bas assambleıasy ashyldy
Bıylǵy assambleıa jyldaǵydan erekshe bolmaq – pandemııaǵa jáne AQSh bıligi engizgen sharalarǵa baılanysty álem kóshbasshylary Nıý-Iorkke kelmeıdi. Onyń ornyna olar 22 qyrkúıek kúni bastalatyn debatqa beıneúndeý joldaıdy. Buǵan deıin Amerıka bıligi Nıý-Iorkke kelgisi kelgen ár adamdy 14 kúndik karantınge jatqyzý qajettigin habarlaǵan.
«COVID-19 pandemııasy – daǵdarys jáne ol ómirimizdegi eshbir daǵdarysqa uqsamaıdy, sol sebepti bıylǵy Bas assambleıanyń sessııasy da basqalarynan erek» dep málimdedi baspasóz konferentsııasy kezinde BUU bas hatshysy Antonıo Gýtterısh.
Gýtterısh koronavırýsqa qarsy vaktsına jasaý men ekologııa úshin kúresýge basymdyq berý kerek dedi:
«Jańa koronavırýsqa qarsy vaktsına jasaý jáne atmosferaǵa taraıtyn kómirqyshqyl gazynyń kólemin azaıtý – halyqaralyq qaýymdastyq jaqyn ýaqytta aınalysatyn eń mańyzdy máseleler».
Buǵan deıin habarlanǵandaı, BUU Bas assambleıasynyń jumysyna Qazaqstan Prezıdenti Qasym-Jomart Toqaev ta qatysyp, aǵylshyn tilinde eki beıneúndeý jasaıdy. Onyń biri - uıymnyń 75 jyldyǵyna arnalsa, ekinshisi – kún tártibindegi debatqa qatysty.
Dıplomattar men sholýshylardyń pikirinshe, bul jolǵy assambleıa uıymnyń mereıtoıynan bólek, qashyqtan ZOOM-dıplomatııa túrinde ótetinimen erekshelenedi.
Búgin merekelik bólimdegi shaǵyn resmı rásimde Antonıo Gýtterısh shtab-páterde bolyp, sóz sóıleıdi. Mereıtoılyq sessııa «Biz qalaıtyn bolashaq, bizge qajet Birikken Ulttar Uıymy: mýltılateralızmge ujymdyq beıildiligimizdi naqtylaý» degen uranmen ótedi.
