Nıý-Iorkte aspanmen talasqan ǵımarattyń 100 qabatynyń qurylysy aıaqtaldy
ASTANA. 4 sáýir. QazAqparat - Nıý-Iorkte 2001 jylǵy 11 qyrkúıektegi lańkestik kezinde qıraǵan Búkilálemdik saýda úıiniń qos ǵımaraty ornyna salynyp jatqan aspanmen talasqan záýlim úıdiń 100 qabatynyń qurylysy aıaqtaldy, dep habarlady ITAR-TASS.
Resmı túrde VTTs-1 dep atalǵan ǵımarat qurylysynyń jumystary budan alty jyl buryn - 2006 jyly sáýirde bastalǵan bolatyn. 104 qabatty Bostandyq munarasy Batys jartyshar aýmaǵyndaǵy eń bıik jáne álemdegi úshinshi aspanmen talasqan ǵımarat bolmaq. Onyń bıiktigi - 1776 fýt (541 metr), ol AQSh táýelsizdigi jarııalanǵan jyldy beıneleıdi. Qurylysty aıaqtaý 2012 jylǵy jeltoqsanǵa, ony saltanatty ashý - 2013 jyldyń jazyna josparlanǵan.
VTTs-1 qurylysynyń quny keminde 3,8 mıllıard dollarǵa baǵalanyp otyr, ol álemdegi eń qymbat ǵımarat bolmaqshy.
Nıý-Iorktegi eń bıik ǵımarat bolý úshin VTTs-1 taǵy 1,2 metrge bıiktemek. Qala ókimet oryndary men sáýletshilerdiń oıynsha, VTTs-1 ǵalamshardaǵy eń qaýipsiz jáne senimdi ǵımarat bolýy tıis - onyń irgetasy qurysh biliktermen bekitilgen, alǵashqy birneshe qabattary qýatty temir-betonnan quıylǵan.
Búkilálemdik saýda ortalyǵynyń jańa kesheni quramyna VTTs-1-den basqa taǵy úsh bıik keńse ǵımarattary kiredi, sondaı-aq 11 qyrkúıektegi lańkestik qurbandaryna arnalǵan memorıal men murajaı ornalasady. Memorıaldyń ashylýy ótken jylǵy qyrkúıekte - osy qaıǵyly oqıǵanyń on jyldyǵyna oraı bolyp ótti, al murajaı bıylǵy jyldyń kúzinde ashylmaq.
