Nıý-Iorkte alapat órt boldy
ASTANA. QazAqparat - Nıý-Iorktiń Bronks aýdanyndaǵy turǵyn úıdi sharpyǵan órt kem degende 12 adamnyń ómirin qıdy, arasynda balalar da bar.
Euronews-tiń habarlaýynsha, tórt adam aýyr halde jatyr, taǵy 12 adam jaraqattanǵan.
Órt jergilikti ýaqytpen keshki jetiler shamasynda úıdiń birinshi qabatynda tutanyp, kózdi ashyp-jumǵansha búkil ǵımarat jalyn qushaǵynda qaldy.
Keıbir turǵyndar aýlaǵa terezeden sekirip túsýge májbúr bolǵan. Qazir Nıý-Iork kóshelerinde aýa temperatýrasy nólden tómen, al adamdar qoldaryna ilingenin kıip, tipti aıaq kıimsiz qashyp shyqqan.
Qazir órt tolyqtaı sóndirildi, oqys oqıǵanyń mán-jaıy tekserilip jatyr.
