Nıý-Iork turǵyny Djordj Býshty óltirmek bolǵany úshin tutqyndaldy
ASTANA. QazAqparat - Nıý-Iork polıtsııasy AQSh-tyń burynǵy prezıdenti kishi Djordj Býshty óltirmek bolǵan qarýly er adamdy qolǵa túsirdi, dep habarlaıdy lenta.ru CNN-ge silteme jasap.
Bendjamın Smıt 31 qańtar kúni Manhettende kóliginiń ishinde otyrǵan kezinde qolǵa túsken. Onyń kóliginen qarý, eki qorap oq jáne semser tabylǵan. Ustaý kezinde Smıt Býshtyń ózinen «qutylmaıtyndyǵyn» aıtyp, aıǵaılaýmen bolǵan. Polıtsııanyń málimeti boıynsha, ustalǵan azamat burynǵy prezıdenttiń qyzy Barbara Býshpen qosylý úshin onyń ákesin óltirmek bolǵan.
Smıttiń izine túsýge onyń sheshesi kómektesken. Ol ulynyń «Býshty óltiremin» degen sıpatta jazylǵan hatyn taýyp alǵan. Hatta mynadaı joldar bolǵan: «Maǵan aıdahardy óltirý kerek, sonda Barbara Býsh mendik bolady. Amerıkanyń kúni bitti. Obamanyń da, báriniń de kúnderi taýsyldy!». Ulynyń jazbasyn taýyp alǵan anasy birden polıtsııaǵa úıinde turǵan qarýdyń joǵalyp ketkenin, ulynyń bir jaqqa ketip qalǵanyn habarlaıdy.
Smıttiń otyrǵan jeri onyń uıaly telefony arqyly anyqtaldy. Kúdiktini ustaýǵa burynǵy memleket basshylaryn qorǵaýǵa mindettelgen AQSh-tyń qupııa qyzmeti qatysty. Aıta keteıik, AQSh-ta qazirgi nemese burynǵy prezıdenttiń atyna qoqan-loqqy jasaý qylmys bolyp tabylady.
