Nıý-Iork turǵyndary Donald Tramptyń áıeliniń qaladan ketýin talap etýde
ASTANA. QazAqparat - Nıý-Iorktyń 100 myńǵa jýyq turǵyny AQSh-tyń jańadan saılanǵan prezıdenti Donald Tramptyń jubaıy Melanıanyń ınaýgýratsııadan keıin qaladan ketýin talap etip, petıtsııaǵa qol qoıdy, dep habarlaıdy QazAqparat.
russian.rt.com saıtynyń jazýynsha, Donald Tramp pen onyń otbasynyń qaýipsizdigin qamtamasyz etý úshin Nıý-Iork bıligi kún saıyn bir mıllıon dollar jumsaıtyn kórinedi.
«Eger mundaı sheshim qabyldanatyn bolsa, bul úshin solar ǵana (RT - Tramptar áýleti) tóleýi tıis. Nıý-Iorktyń salyqshylary esebinen emes, ol aqshalardyń joldarǵa, mektepterge, kólikke, sanıtarııaǵa, jańa jumys oryndaryna jáne qalanyń basqa da shyǵyndaryna jumsalǵany jón», - dep jazdy adamdar úndeýhatta.
Buǵan deıin Tramp onyń jubaıy Melanıa men uly Berron ulyqtaý rásiminen keıin Aq úıge kóshýdi josparlamaıtynyn jáne olar Nıý-Iorkte qalatyndyǵyn málim etken bolatyn.
Melanıa Tramp AQSh-tyń birinshi ledıi retindegi qyzmette nemen aınalysatyndyǵyn jarııalady. Burynǵy fotomodel bar kúsh-jigerin áıelder men balalardyń quqyǵyn qorǵaýǵa jumsamaq.
