Nıý-Iork áýejaıynda bosqyndardy tutqyndaýǵa qarsy narazylyq bastaldy
ASTANA. QazAqparat - Nıý-Iork qalasynyń Djon Kennedı atyndaǵy halyqaralyq áýejaıynda prezıdent Donald Tramptyń bosqyndardy AQSh aýmaǵyna kirgizbeý týraly jarlyǵyna sáıkes 11 adam ustaldy. Birneshe belsendi áýejaı termınalynda narazylyq uıymdastyryp, qonys aýdarýǵa májbúr bolǵan bosqyndardy bosatýdy surady, dep habarlaıdy Bı-Bı-Sı.
Kelgen jýrnalısterdiń habarlamasyna sáıkes, narazylyq bildirýshiler «Biz bosqyndarmen birgemiz» dep urandap jatqanda, keıbir musylmandar duǵa jasaýmen bolǵan.
Bul jarlyqtyń saldary ázirge belgisiz. Adam quqyqtaryn qorǵaý týraly birneshe uıymdar bul jarlyqqa qarsy sotqa shaǵym túsiretini habarlandy.
Tramptyń jarlyǵynda kórsetilgen jeti eldiń áýe kompanııalary óz jolaýshylaryna eger olardyń AQSh-ta turý týraly yqtııar haty (Grın-karta) nemese dıplomatııalyq vızasy bolmasa, Amerıkaǵa reıs jasaýdan bas tartýǵa májbúr ekendigin málimdegen.
Bul elderdiń qatarynda - Irak, Iran, Iemen, Lıvııa, Sırııa, Somalı men Sýdan bar.
AQSh prezıdenti Donald Tramp Sırııadan keletin bosqyndardy qabyldamaý týraly jarlyqqa juma kúni AQSh-tyń qorǵanys mınıstri qyzmetine general Djeıms Mattısti ulyqtaý rásiminde qol qoıdy. Sonymen qatar ózge memleketterden keletin mıgranttardy kirgizýdi 120 kúnge shektedi.
«Elimizge tek bizdi qoldaıtyn jáne halqymyzdy shyn kóńilimen jaqsy kóretin adamdardy ǵana kirgizgimiz keledi», - dep atap ótti Tramp qol qoıý rásiminde.
