Nıý-Djersıdegi poıyz apatynda bir adam kóz jumyp, 100-den astamy jaraqattandy
ASTANA. QazAqparat - Búgin amerıkalyq Nıý-Djersı shtatynda jolaýshylar poıyzynyń apaty oryn aldy.
Shtat gýbernatorynyń aıtýynsha, oqıǵa saldarynan bir adam qaza bolyp, 108-i túrli jaraqattar aldy. Onyń 74-i aýrýhanaǵa jetkizildi. Bul týraly Bı-Bı-Sı habarlaýda.
Buǵan deıin jergilikti BAQ atalmysh apatta úsh adamnyń mert bolǵanyn jazǵan edi.
Beısenbi kúni tańerteń Nıý-Iorkten shamamen 11 shaqyrym jerde ornalasqan Hoboken stansysynda poıyz platformaǵa soǵyldy. Kýágerlerdiń sózine qaraǵanda, poıyz býferli tejeýishtiń janyna toqtamaı, qozǵalysyn jalǵastyra otyra ǵımarattyń kútý zalyna biraq kirgen. Saldarynan shatyrdyń bir bóligi opyrylyp qulady.
Qazirgi ýaqytta stansyda temirjol qozǵalysy tolyǵymen toqtatyldy. Gýbernator Krıs Krıstıdiń aıtýynsha, qozǵalys jaqyn ýaqytta jandanady. Apat saldary anyqtalý ústinde.
