Nıý-Delıdi tútin basyp qaldy, qaladaǵy kólik qozǵalysy toqtaýy múmkin
NЬıÝ-DELI. QazAqparat – Úndistannyń Nıý-Delı qalasynyń bıligi eldiń astanalyq aımaǵynda aýa sapasynyń qaýipti lastanýynan kólik paıdalanýǵa tyıym salyp, birqatar ónerkásip jumysyn toqtatý múmkindigin qarastyryp otyr. Búl týraly QazAqparat ANI agenttigine silteme jasap habarlaıdy.
«Biz Joǵarǵy sotqa eger lokdaýn tek astanalyq aımaqta (Nıý-Delıden basqa, Noıda, Farıdabad, Gazıabad, Gýrýgram qalalary) engizilse, oǵan daıyn ekenimizdi aıttyq. Aýanyń lastanýyna qarsy kúreste birlesken áreketter qajet. Biz olardy shtat bılikterimen, ortalyq bılikpen birlesip qabyldaýǵa daıynbyz», - degen Delı úkimetiniń Qorshaǵan ortany qorǵaý mınıstri Gopal Raıdyń sózderin keltirdi ANI.
Agenttiktiń atap ótýinshe, Delı bıligi ónerkásip kásiporyndarynyń jumysyn toqtatý, jeke kólikti paıdalanýǵa tyıym salý sııaqty sharalardy qarastyryp jatyr. Nıý-Delıde keńse ortalyqtaryn jabý jáne qyzmetkerlerin qashyqtan jumys atqarýǵa jiberý sııaqty sharalar da engizilýi ábden múmkin. Al buǵan deıin qalada mektepterdegi sabaq toqtatylyp, qurylys jumystaryn júrgizýge tyıym salynǵan edi.
Úndistan astanasynda jyl saıyn kúz mezgilindegi aýa sapasynyń nasharlaýy qala mańyndaǵy aq sabaqtar men sabandy jappaı órteýmen baılanysty. Budan basqa, sarapshylardyń baǵalaýynsha, qalany qoıý tútinniń basýyna avtomobıldiń tolassyz qozǵalysy da áser etken.
