Nıý-Delıde Qazaqstan-Úndistan ınvestıtsııalyq forýmy ótedi

DELI. QazAqparat - Bıylǵy 12-14 qarasha kúnderi Nıý-Delıde Qazaqstan-Úndistan ınvestıtsııalyq forýmy ótedi, dep habarlaıdy QazAqparattyń menshikti tilshisi.

Ony Qazaqstannyń Úndistandaǵy Elshiligi, Kazakh Invest Ulttyq kompanııasy jáne Úndi saýda-ónerkásip palatalary federatsııasy (FICCI) birlesip uıymdastyryp otyr.

Qazaqstannyń 10-nan astam jetekshi kompanııasynyń basshylarynan quralǵan delegatsııaǵa «Kazakh Invest Ulttyq kompanııasy» AQ basqarma tóraǵasy Saparbek Tuıaqbaev basshylyq etedi.

Forýmǵa Úndistan Saýda jáne ónerkásip mınıstrliginiń, Syrtqy ister mınıstrliginiń, Úndi saýda-ónerkásip palatalary federatsııasy ókilderi, sondaı-aq 50-den astam kompanııa basshylary qatysady.

Shara aıasynda jalpy otyrys (14 qarasha), taqyryptyq sektsııalar, Úndistannyń iri transulttyq kompanııalarymen ekijaqty kezdesýler, (12-13 qarasha) ótedi. Onda qazaqstandyq kásipkerler ınvestıtsııalyq jobalary týraly tolyqqandy aqparat beredi.

Qazaqstan men Úndistan arasyndaǵy dıplomatııalyq qatynastardyń ornatylǵanyna 26 jyl boldy. Ekijaqty yntymaqtastyq 2009 jyly Qazaqstan Prezıdenti Nursultan Nazarbaevtyń Úndistanǵa barǵan saparynan keıin strategııalyq deńgeıge kóterilgen.

Eki eldiń ǵarysh, áskerı-tehnıkalyq, IT, Fintech, munaı jáne gaz, bank isi, t.b. salalardaǵy yntymaqtastyǵy tabysty bolyp otyr. Tengrı Bank (Pendjab Ulttyq banki ony aktsııalarynyń 49 paıyzyna ıe) sońǵy eki jylda úndi kompanııalarynyń 80-nen astam esep shottaryn ashqan.

Budan bólek, Qazaqstan Úndistanǵa ýran jetkizýshi negizgi memleket. Eki el arasyndaǵy taýar aınalymy búginde 1 mlrd dollar shamasynda.