Nıý-Delı Amazon-ǵa Úndistan týy beınelengen kompıýter kilemshesin satýdy toqtatqyzdy
ASTANA. QazAqparat -Amazon.com óziniń kanadalyq saıtynda úndistandyq tý beınelengen kilemshelerdiń satylymyn toqtatty. Oǵan sebep - Úndistan bıliginiń amerıkalyq kompanııa qyzmetkerleri vızasynyń kúshin joıamyz dep ses kórsetýi, dep habarlaıdy Reuters.
«Amazon sózsiz keshirim suraýy tıis, - dep jazdy Týıtterge Úndistan syrtqy ister mınıstri Sýshma Svaradj. - Olar bizdiń memlekettik týymyzdy qorlaǵan barlyq taýardy satylymnan alyp tastaý kerek».
«Eger muny tez arada oryndamasa, biz Amazon-nyń birde-bir qyzmetkerine úndistandyq vıza bermeımiz, - dedi ol. - Sondaı-aq, buryndary bergen barlyq vızanyń kúshin joıamyz».
Sársenbi kúni keshke Amazon-nyń kanadalyq saıtynda kilemshe satylymnan alyndy.
Amazon saıtynyń kanadalyq nusqasynda ózge memleketterdiń týy beınelengen kilemsheler satylady.
Aıta keterligi, Úndistan zańdarynda memlekettik týdy qorlaǵandarǵa aıyppul jáne tutqynǵa alý sekildi jaza túrleri qarastyrylǵan.
