N.Tilendıev týraly «Qustar áni» fılmi kórermenge jol tartady
ASTANA. QazAqparat - «Habar» agenttiginiń tapsyrysymen qazaqtyń daryndy tulǵasy, uly sazger Nurǵısa Tilendıevtiń shyǵarmashylyǵy týraly fılm túsirilýde.
Fılm ataqty «Otyrar sazy» orkestriniń qurylǵan sátinen bastalady. Kórkem fılm sazgerdiń biregeı mýzykalyq týyndysymen «Qustar áni» dep atalady. Fılmniń rejısseri Rashıd Súleımenovtiń aıtýynsha, qazaqtyń birtýar, dara uly týraly fılm túsirý úshin sazgermen aralasqan, qatar júrgen kóptegen jandarmen áńgimelesken. Rejısser bas keıipkerdiń obrazyn somdaý úshin akter Ergenbaı Abýevti tańdapty. - Ol kisini men jas kezimnen kóp ret kórdim. Kontsertterine bardym. Ustazym Qazaqstannyń halyq ártisi, professor Asqar Toqpanov meni bir ertip baryp, «mynaý meniń jaqsy shákirtim, ádeıi saǵan kórsetýge alyp keldim» dep tanystyrdy. Ol kisi mýzykany basqasha tyńdaıdy, basqasha sezinedi, múldem basqasha kóredi, - deıdi Ergenbaı Abýev. Fılmde dombyrashy qyz Jibek sazgerdi óziniń sheber oryndaýshylyǵymen tańǵaldyrady. Bir qyzyǵy, Jibektiń rólinde oınaıtyn aktrısa Gúlnaz Jolanova eshqashan qolyna dombyra ustamaǵan. Kastıngten ótken soń, Nurǵısa Tilendıevtiń kúılerin úırenipti. - Bul meniń alǵashqy tarıhı jobam. Munyń qanshalyqty jaýapkershiligi joǵary, qanshalyqty mańyzdy ekenin sezinemin. Bar kúshimizdi salyp jatyrmyz, kórermenniń kóńilinen shyǵady degen úmittemin, - deıdi aktrısa Gúlnaz Jolanova. «Qustar áni» 5 serııaly kórkem fılmin kórermender jaqyn ýaqytta «Habar» telearnasynan tamashalaı alady, dep habarlaıdy 24.kz.
