N.Tilendıev Q.Baıbosynovqa qalaı ókil áke boldy?
ASTANA. QazAqparat - Qazaqstannyń halyq ártisi, Memlekettik syılyqtyń laýreaty, ánshi Qaırat Baıbosynov «Astana aqshamy» gazetine bergen suhbatynda Nurǵısa Tilendıevtiń ózine qalaı ókil áke atanǵan oqıǵany aıtyp berdi.
«Mektepte oqyp júrgende Qaraǵandyǵa Almatydaǵy Abaı atyndaǵy opera jáne balet teatry jazǵy gastroldik saparmen keldi.
Ony atalǵan teatrdyń dırektory, keıin Mádenıet mınıstri bolǵan Jeksenbek Erkinbekov aǵamyz bastap keldi. Teatr quramynda Ǵarıfolla Qurmanǵalıev, Nurǵısa Tilendıev, Ermek Serkebaev, Aısulý Baıqadamova jáne Ánýarbek Úmbetbaev sekildi birinen biri ótken áıgili ánshiler bar. Sonda Nurǵısa aǵamyz ózi fortepıanoda oınap, men onyń «Jansáýlem» dep atalatyn ánin qosyla oryndadym.
Ónerime rıza bolǵany sonshalyq Nuraǵam meni kóterip alyp: «Maǵan bala bolasyń ba?» - dedi. «Men bolamyn», dedim. Osy sózdi Alla aýzyma salǵan bolar, Almatyǵa oqýǵa túskende Júsekeńniń sabaǵyna «Qaıratty tyńdap keteıin» dep jıi keletin.
Oqýyma da bir jyl bolmaǵan shaq edi. Birde Nurǵısa aǵam keldi. «Júseke, «Qyz Jibek» fılmi túsiriledi. Tólegenniń ánderin Qaıratqa oryndatam. Balamdy maǵan ber» dep surady. Ustazym abdyrap qaldy. «Qaırat áli ánniń álippesin aıaqtaǵan joq. Endi bastap jatyr, shıki ǵoı», dedi. «Joq, Qaırat ándi alyp ketedi. Oǵan senimim mol» dep Nuraǵam nyqtap qoıdy.
Qolymnan jetektep kıno túsirip jatqan alańǵa alyp bardy. Fılmdi Qapshaǵaı jaqta túsirip jatyr eken. Kún shyjyǵan ystyq. Týra tóbeńnen ótedi. Maǵan Sansyzbaıdyń rólin bermekshi boldy. Odan bas tarttym. Men ánshimin, akterlik qolymnan kelmeıdi dep. Tólegenniń ánderin tolyq oryndap shyqtym. Sóıtip, ónerdegi ókil ákem - Nurǵısa boldy», - deıdi ánshi Qaırat Baıbosynov.
