N. Saýranbaev: Básekelestik saýdany engizýdiń negizgi maqsaty - jer qoınaýyn paıdalaný quqyǵyn alý rásimin barynsha jeńildetý
ASTANA. QazAqparat - Jer qoınaýyn paıdalaný quqyǵy básekelestik saýda qaǵıdasy boıynsha usynylýy múmkin. Búgin Parlament Májilisinde Indýstrııa jáne jańa tehnologııalar mınıstriniń orynbasary Nurlan Saýranbaev osylaı málim etti. Eske salaıyq, Májiliste «Qazaqstan Respýblıkasynyń keıbir zańnamalyq aktilerine jer qoınaýyn paıdalaný máseleleri boıynsha ózgerister men tolyqtyrýlar engizý týraly» zań jobasynyń tanystyrylymy bolyp ótken edi.
«Básekelestik saýdany engizýdiń negizgi maqsaty - memlekettik quzyretti organdar úshin de, jer qoınaýyn paıdalanýshylar úshin de jer qoınaýyn paıdalaný quqyǵyn alý rásimin barynsha jeńildetý jáne talaptardy ońaılatý. Qazirgi kezde konkýrs jeńimpazyn anyqtaý barysynda aımaq ınfraqurylymynyń damýyna jumsalatyn shyǵyn da eleýli ról atqaratyny belgili. Al endigide mundaı shyǵyn quzyretti organmen bekitilgen mólsherleme túrinde belgilenetin bolady. Jer qoınaýyn paıdalanýshyǵa onyń kólemi básekelestik saýdalardy ótkizý bastalǵanǵa deıin belgili bolady», - deıdi N. Saýranbaev. Osylaısha, vıtse-mınıstrdiń sózine qaraǵanda, básekelestik saýdalardy ótkizý kezinde kimde-kim memleketpen qol qoıylatyn bonýstyń eń úlken somasyn usynsa, jer qoınaýyn paıdalaný quqyǵyn sol alady. Mınıstrlik ókiliniń pikirinshe, bul konkýrsty ótkizýdiń oryndylyǵyn qamtamasyz etedi jáne múmkin bolatyn sybaılastyq faktorlaryn joıady.
Budan bólek, aldaǵy ýaqytta jer qoınaýyn paıdalanýshylar úshin kelisimshart boıynsha qarastyrylǵan mindetti saraptamalardy 60 paıyzǵa deıin qysqartý kózdeledi.
