N. Orazdyń «Úsh taǵan» atty jyr jınaǵy jaryq kórdi
ASTANA. 21 jeltoqsan. QazAqparat - Astana qalasyndaǵy «Folıant» baspasynan aqyn, jazýshy, Qazaqstannyń eńbek sińirgen qaıratkeri Nurǵoja Orazdyń «Úsh taǵan» atty poezııalyq jyr jınaǵy jaryq kórdi.
Bul kitapqa qalamgerdiń sońǵy jyldary jazǵan óleńderi men úsh poemasy engen.
Aqyn jańa jyr týyndysynda táýelsizdik jyldary qol jetkizgen tabystarymyz, eldik birligimiz, jarasym tapqan beıbitshilik pen yntymaǵymyz týraly oı tolǵaıdy. Sonymen qatar tabıǵat beınesi, qoǵamdaǵy ár túrli kórinister, adamdardyń qarym-qatynasy birqatar óleńderine arqaý bolǵan. Endi bir lırıkalyq jyrlarynda aqynnyń ishki sezimi, mahabbat pen sulýlyq, pák júrek men shynaıy kóńili kórinis tapqan.
Aqyn halqymen syrlasa otyryp, búgingi beıbit kúndi baǵalaı bilýge shaqyrady. Osy óleńinde «Tynyshtyqtyń ár kúni ǵasyrǵa teń!» dep oı túıedi.
«Táýelsizdik tańy atty» poemasynda qazaqtyń azattyq jolyndaǵy kúresin jyrlaı kelip, halqymyzdyń ǵasyrlar boıy ata-babalarymyz ańsaǵan kúnge jetkenin baıandaıdy. Táýelsizdik týyn kóterýdegi Memleket basshysynyń eren eńbegin jyrǵa qosqan.
«Tarıh ata taǵylymyn shyn uqqan -
Halqymyzdaı ot pen sýdan shynyqqan
Nursultan tur endigi kósh basynda
Ada qylǵan pák qazaǵyn quryqtan.»- deıdi aqyn. Bul poema «Táýelsizdik tańy máńgi atty» degen oımen túıindeledi.
Sondaı-aq osy jınaqta aqynnyń «Mama batyr» jáne «Túkti Sardar» atty tarıhı poemalary bar.
