N.Nyǵmatýlın: Travmatıkalyq qarýǵa qatań baqylaý qajet
ASTANA. 29 mamyr. QazAqparat - Májiliste ótip jatqan «Travmatıkalyq qarý: zańnamalyq retteý máseleleri» taqyrybyndaǵy «dóńgelek ústel» otyrysynda travmatıkalyq qarý jaǵdaıyna basa nazar aýdarylýda,
dep habarlady palatanyń baspasóz qyzmeti.
Osy tusta aıtylǵan usynystardyń biri - travmatıkalyq qarýdy azamattyq aınalymnan alyp, qyzmettik sanatqa aýystyrý týraly. Oǵan birden-bir sebep, sońǵy ýaqyttarda travmatıkalyq qarýdy paıdalaný arqyly jasalǵan qylmystar sany qarqyn alyp barady.
Atalǵan aspektilerdi jan-jaqty qaraý maqsatynda Májilistiń zańnama jáne sot-quqyqtyq reforma komıteti, «Nur Otan» partııasy janyndaǵy Quqyqtyq keńes osy máselelerdiń keńinen talqylanýyna bastamashy bolyp otyr.
Májilis Tóraǵasy Nurlan Nyǵmatýlınniń atap ótkenindeı, qarý shyn máninde, qorǵaný quraly emes, bul shabýyl jasaý quraly. Sondyqtan, bul jerde eki túrli pikirge jol berýge bolmaıdy, kez kelgen qarý aınalymy egjeı-tegjeıli jáne qatań baqylaýdy talap etedi.
- Sońǵy 5 jylda ishki ister organdarynda travmatıkalyq qarýdy ózin-ózi qorǵaý maqsatynda paıdalanǵan 19 oqıǵa tirkelgen, al kerisinshe, osy qarýmen qylmys jasaǵan jaǵdaılar sany myńǵa jetedi. Sondyqtan, ózin-ózi qorǵaýǵa arnalǵan qarý qaýipke aınalǵan kezde, bizdiń azamattarymyzdy qorǵaýdyń bir ǵana amaly - bul qarýǵa tyıym salý nemese ony paıdalanýǵa baılanysty talapty kúsheıtý,-dedi Nurlan Nyǵmatýlın.
«Dóńgelek ústel» jumysyna Májilis depýtattary, Bas prokýratýra jáne Іshki ister, Densaýlyq saqtaý, Bilim jáne ǵylym mınıstrlikteri, sonymen birge azamattyq sektor ókilderi qatysýda.
