N. Nyǵmatýlın múmkin bolatyn daǵdarystar men qaıshylyqtardyń aldyn alýǵa qabiletti tulǵa - Q.Sultanov
ASTANA. QazAqparat - N. Nyǵmatýlın múmkin bolatyn daǵdarystar men qaıshylyqtardyń aldyn alýǵa qabiletti tulǵa. Búgin Májilistiń jalpy otyrysynda Palata tóraǵalyǵyna usynylǵan kandıdatýrany talqylaý barysynda depýtat Qýanysh Sultanov osyndaı pikir bildirdi.
Onyń aıtýynsha, N. Nyǵmatýlın Elbasynyń memlekettiń eń jaýapty máselelerin sheshýde zor senim kórsetip júrgen áriptesteriniń biregeıi. Ol memleket qurylysy men qýattanýy baǵytynda Prezıdent tapsyrǵan asa mańyzdy laýazymdar men mindetterdi abyroımen atqaryp kele jatqan tulǵa.
«N. Nyǵmatýlın óńirler men memleket basqarý isiniń kúrdeli ári mol tájirıbeli mektebinen ótip, el tynysy men jaǵdaıyn biletin, shyńdalyp, kemeldengen, elge tanymal memlekettik qaıratker. N. Nazarbaevtyń qoǵamnyń sapasyn ózgertetin Bes ınstıtýttyq reformalary «100 naqty qadamy» bizdiń barlyǵymyzǵa, ásirese Úkimetke, Parlament pen sot bıligine, jalpy barlyq memlekettik ınstıtýttarǵa jańa mindetter júktep otyr. Olardy oryndaý jolynda bizdiń ómirimizdiń kóp salasyna túbegeıli, órkenıetti ózgerister enetini haq. N. Nyǵmatýlın Elbasynyń osy strategııasyn júzege asyrýdyń mazmuny men tetigin biletin adam. Ol múmkin bolatyn daǵdarystar men qaıshylyqtardyń aldyn alýǵa qabiletti», dedi Q. Sultanov. Onyń paıymynsha, N. Nyǵmatýlın Parlament ujymyn utymdy uıymdastyrýǵa sheber ári kez kelgen iske shıraq qaraıtyn qabiletti basshy.
