N.Nyǵmatýlın men E. Heınıalýoma parlamentaralyq yntymaqtastyq máselelerin talqylady
ASTANA. QazAqparat - Parlament Májilisiniń Spıkeri Nurlan Nyǵmatýlın Májilistiń shaqyrýymen Qazaqstanǵa alǵash ret resmı saparmen kelgen Fınlıandııa parlamentiniń tóraǵasy Eero Heınıalýomamen kezdesti. Bul týraly Májilistiń baspasóz qyzmetinen habarlady.
Taraptardyń atap ótkenindeı, qos memleket - syrtqy saıası jáne ekonomıkalyq mańyzdy áriptester. Eki el basshylarynyń etene baılanystary da eki jaqty qarym-qatynasty odan ári qarqyndy damytýǵa degen qulshynystyń aıqyn kórsetkishi.
Ózara yntymaqtastyqtyń mańyzdy baǵyttarynyń qatarynda ınnovatsııa, «jasyl ekonomıka», bilim, sondaı-aq, BUU, EQYU, Eýropa Keńesi basqa da halyqaralyq birlestikter men uıymdar aıasynda belsendi is-qımyldy atap ótýge bolady. Májilis Tóraǵasy: «Bizdiń elderimizdiń «jasyl kópir» baǵdarlamasy sheńberindegi yqpaldastyǵy «jasyl» tehnologııalar salasyndaǵy ózara is-qımyldyń jarqyn úlgisi bola alady. Biz fındik áriptesterimiz qazaqstandyq bastamaǵa qoldaý kórsetip, «Jasyl kópir» áriptestigi baǵdarlamasy týraly Hartııaǵa qosylady dep esepteımiz»,- dedi.
Qazaqstannyń bolashaq damýy týraly aıtqanda Nurlan Nyǵmatýlın Elbasynyń «Qazaqstan - 2050 Strategııasyn» júzege asyrý asyl murattarǵa jetý jolynda barsha qazaqstandyqtardy biriktirgenin atap ótti.
Óz kezeginde Eero Heınıalýoma, Qazaqstannyń aımaqtaǵy jáne álemdik arenadaǵy rólin joǵary baǵalaı kelip, bizdiń elimiz jetistikteri, sondaı-aq Qazaqstan damýyndaǵy turaqtylyq dúnıe júzi elderi úshin úlgi ekendigin aıtty.
Beıbitshilikti, turaqtylyqty, qaýipsizdikti nyǵaıtý máselesin sóz etkende Nurlan Nyǵmatýlın Elbasy Nursultan Nazarbaevtyń barlyq antııadrolyq bastamalarynyń mańyzdylyǵyna toqtaldy. Ol bastamalar halyqaralyq qaýymdastyqta bizdiń elimiz jaýapkershiliginiń joǵary deńgeıin kórsetedi.
«Qazaqstan Eýroodaqtyń qaýipsizdik máselesi jóninde Eýroodaq - Ortalyq Azııa joǵary deńgeıli Únqatysý qurý bastamasyn qoldady jáne onyń damýyna barynsha yqpal etýge daıyn», - dedi Nurlan Nyǵmatýlın.
Májilis Spıkeri sondaı-aq, qazaqstandyq parlamentshilerdiń Taıaý Shyǵysta ıadrolyq qarýdan jáne jappaı qyryp joıatyn qarýdan azat aımaq qurý týraly halyqaralyq konferentsııaǵa qatysýǵa daıyn ekenin jetkizdi. Shara Helsınkı qalasynda ótedi dep josparlanǵan.
Nurlan Nyǵmatýlınniń aıtýynsha, Qazaqstan úshin negizgi basymdyqtardyń biri - eýropalyq quqyqtyq keńistikke qosylý bolyp tabylady.
Osyǵan oraı eki el spıkerleri parlamentaralyq qarym-qatynasqa aıryqsha nazar aýdardy. Ony damytýǵa qos memlekettiń zańnamalyq organdarynda qurylǵan yntymaqtastyq jónindegi toptar óz áserin tıgizbek.
Nurlan Nyǵmatýlın men Eero Heınıalýomanyń atap ótkenindeı, ózara is-qımyldy kúsheıtý úshin fraktsııalar men komıtetter arasynda berik baılanys ornatý aıryshqa ról atqarmaq. Májilis Tóraǵasy: «Fındik áriptesterimizdiń ınnovatsııalyq damýdy zańnamalyq qamtamasyz etý, bilim júıesin jetildirý, ekonomıkaǵa «ekologııalyq» kózqaras salasyndaǵy tájirıbeleri bizdiń erekshe nazarymyzda. Biz EQYU PA, Parlamentaralyq Odaq syndy basqa da halyqaralyq parlamenttik uıymdar aıasynda bir-birimizdiń bastamalarymyzdy ózara qoldaý múmkindigimiz zor»,- dep atap ótti.
Kezdesý sońynda Májilis Spıkeri Fınlıandııa Parlamenti Tóraǵasynyń sapary eki el parlamentteri arasyndaǵy saıası únqatysý men ózara túsinistikti ornyqtyrýǵa yqpal etetinine senim bildirdi.
Eero Heınıalýoma qazaqstandyq áriptesterine tilektestigin bildirip, parlamentterdiń eki el halyqtary arasyndaǵy dostyqty myǵym etýge óz úlesterin qosa alatyndyǵyn senimmen aıtty.
