N.Nyǵmatýlın: Fınlıandııalyq áriptesterimizben ortaq máseleler kóp
ASTANA. 27 naýryz. QazAqparat - Qazaqstan Parlamenti Májilisiniń tóraǵasy Nurlan Nyǵmatýlın Fınlıandııa Respýblıkasynyń Qazaqstandaǵy Tótenshe jáne Ókiletti Elshisi Mıkko Kınnýnenmen kezdesip, qazaqstandyq jáne fınlıandııalyq yntymaqtastyqty nyǵaıtýdyń ózekti máselelerin talqylady.
Bul týraly Májilis Apparatynyń baspasóz qyzmetinen málim etti.
Áńgime barysynda taraptar eki eldiń qazirgi damý úderisi Qazaqstan men Fınlıandııanyń arasyndaǵy qarym-qatynas strategııalyq áriptestiktiń jańa sapalyq deńgeıge kóterilgendiginiń dáleli ekendigin aıtty. Sonymen qatar, saıası suhbat jolyndaǵy joǵary jetistik tikeleı eki eldiń Kóshbasshylary Nursultan Nazarbaev pen Saýlı Nıınısteniń eńbekteriniń jemisi ekendigine basa nazar aýdardy.
Sondaı-aq, eki eldiń parlamentaralyq yntymaqtastyq jaǵdaıy da nazardan tys qalmady.
Májilis tóraǵasy óz sózinde: «Qazaqstandyq parlament ókilderin, fınlıandııalyq áriptesterdiń zań shyǵarý jolyndaǵy, ásirese, ınnovatsııalyq damý, bilim júıesin jetildirý, ekonomıkaǵa «ekologııalyq» jolmen kelý, jemqorlyqpen kúres, jalpy alǵanda, memleket pen azamattyq qoǵamdy jańǵyrtý jolyndaǵy jumys tájirıbeleri erekshe qyzyqtyrady», - dep atap ótti.
Atalǵan eki eldiń joǵary zań shyǵarýshy organdary arasyndaǵy qarym-qatynasty odan ári kúsheıtý maqsatynda Qazaqstan Parlamentinde Fınlııandııamen yntymaqtastyq jónindegi top quryldy.
Nurlan Nyǵmatýlın men Mıkko Kınnýnen parlament ókilderi arasyndaǵy baılanystyń aldaǵy ýaqytta jańa beleske kóteriletinine jáne Qazaqstan men Fınlıandııa arasynda tabysty yntymaqtastyqtyń bolashaǵy zor ekendigine senim bildirdi.
