N.Noǵaev: Ótken jyly Batys Qazaqstan oblysynda apatty jáne úsh aýysymmen bilim beretin mektepter joıyldy
ASTANA. QazAqparat - Ótken jyly Batys Qazaqstan oblysynda apatty jáne úsh aýysymmen bilim beretin mektepter joıyldy. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte Batys Qazaqstan oblysynyń ákimi Nurlan Noǵaev málim etti.
«Úsh pen alty jas aralyǵyndaǵy balalardy mektepke deıingi tárbıemen qamtý 98 paıyzdy quraıdy. 2014-2015 oqý jylynyń nátıjesi boıynsha Ulttyq biryńǵaı testileýde Batys Qazaqstan oblysy Almaty jáne Astana qalalarynan keıin úshinshi oryndy ıelendi jáne ortasha ball 83-ti qurady», - dedi ol.
Ákimniń aıtýynsha, ótken jyly Elbasy N.Nazarbaevtyń apatty jaǵdaıdaǵy jáne úsh aýysymmen jumys isteıtin mektepterdi joıý tapsyrmasy Batys Qazaqstan oblysynda tolyǵymen oryndaldy. Jańadan mektepter salyndy jáne kúrdeli jóndeýden ótkizildi. Bilim salasyna 42 mlrd. 200 mln. teńge bólindi.
«Oblysta ınklıýzıvti bilim berýge laıyqty mektepterdiń sany 59 paıyzdy quraıdy jáne múmkindigi shekteýli balalardy ınklıýzıvti bilimmen qamtamasyz etý 58 paıyzǵa jetip otyr. Oblystaǵy 38 arnaýly orta bilim beretin kolledjderdiń 7-eýi - jekemenshik. Al 17 kolledjde 18 mamandyq boıynsha dýaldy bilim berý júrgizilýde», - dedi N.Noǵaev.
