N. Noǵaev «Kaspıı turba qubyry konsortsıýmynyń» bas dırektory qyzmetine taǵaıyndalǵan N. Gorbandy qabyldady

ATYRAÝ. QazAqparat - Atyraý oblysynyń ákimi Nurlan Noǵaev Qazaqstannyń batys óńirindegi Teńiz ben Qarashyǵanaq ken oryndarynan óndirilgen munaıdy qubyrmen Reseıdiń Novorossıısk qalasy arqyly Qara teńizge shyǵaratyn halyqaralyq «Kaspıı turba qubyry konsortsıýmyna» (KTK) bas dırektorlyq qyzmetke taǵaıyndalǵan Nıkolaı Gorbandy qabyldady, dep habarlady «Atyraý» gazeti.

 Aımaq basshysy aldymen meımandy jańa qyzmetimen quttyqtap, jaýapty jumysyna tabystar tiledi. Nurlan Asqaruly munaı qubyry jelisi arqyly 67 mln. tonna «qara altyn» jóneltý mejesiniń sońǵy nátıje emes, óndiristik josparlardyń budan da joǵary bolatyndyǵyna senimdi ekendigin aıtty.

- Biz óz tarapymyzdan munaı aıdaýshylarǵa qoldanystaǵy zańdar sheńberinde barlyq qoldaý kórsetýge ázirmiz. Bolashaqta jergilikti atqarýshy organ men kompanııa basshylyǵy ózara túsinistikpen, yntymaqtasa áreket etip, ortaq múddege sáıkes qos tarapqa da tıimdi sheshimder qabyldaıtyndyǵyna senemin, - dedi oblys ákimi. «Kaspıı turba qubyry konsortsıýmynyń» bas dırektory N.Gorban kompanııa úshin munaıly óńirdiń mańyzdy ekendigin aıta kelip, keńeıtý jobalary aıaqtalǵannan keıin jumysshy-qyzmetkerlerdiń jappaı qysqartýy bolmaıtyndyǵyn, jergilikti kadrlardy qoldaý múmkindikteri jan-jaqty qarastyrylatyndyǵyn málimdedi.