N.Nazarbaevtyń sılıkondy músinin jasap shyǵarǵan azamat, óz týyndysyn Elbasyna jeke tapsyrýdy armandaıdy
ASTANA. 13 jeltoqsan. QazAqparat - Arqalyq qalasynyń turǵyny sılıkonnan N.Nazarbaevtyń músinin jasap shyǵaryp, ony Elbasyna jeke tapsyrýǵa nıetti.
Astana qalasynyń ákimi Imanǵalı Tasmaǵambetovtyń jeke blogyna hat jazǵan Aıdos Esmaǵambetov óziniń armanymen bólisti.
«Men Arqalyq qalasynyń turǵynymyn, Beıneleý óneri jáne sýret mamandyǵynyń ıesimin. Qazir gıperralızm janrynda sılıkonnan músinder jasaýmen shuǵyldanamyn. Osydan birer ýaqyt buryn Prezıdent N.Á. Nazarbaevtyń músinin jasadym. Sol týyndymdy Elbasyna tartý etkim keledi... Soǵan járdemdesseńiz eken», - dep jazdy ol óziniń ótinish hatynda.
Músinshi QR Tuńǵysh Prezıdentiniń sılıkondy músinin kórýge bolatyn siltemelerdi de keltirdi - http://www.youtube.com/watch?v=d6frT6BEW7c
Arqalyq azamatynyń usynysymen tanysyp shyqqan I.Tasmaǵambetov Elbasyna sılıkondy músindi syılaý yńǵaısyz ári bizdiń mádenıetimizge jat dep oılaıtyndyǵyn aıtty.
«Sılıkonnan músin jasaý tájirıbesi birneshe jyldar boıy keń qoldanylyp keledi, negizinen, olar balaýyz músinder murajaılaryna qoıylyp, saqtalady. Bul murajaılardyń maqsattary men mindetteri aıqyn. Sizdiń jumysyńyzdy da osyndaı balaýyz músinder murajaıyna jaıǵastyrýǵa bolady. Elbasyna bul jumysty syılaý yńǵaısyz ári bizdiń mádenıetimizge jat nárse bolar dep oılaımyn. Sondyqtan, Elbasyna qurmetińiz ben rızalyǵyńyzdy basqa tásildermen, shynaıy kórkemsýret týyndylarymen de bildirýge bolatynyn aıtqym keledi», - dedi ákim.
