N.Nazarbaevtyń saılaýdaǵy jeńisine baılanysty hattar men quttyqtaý jedelhattary legi jalǵasýda
Memleket basshysynyń atyna álemniń túrli elderiniń beldi saıasatkerlerinen, halyqaralyq uıymdar basshylarynan, kompanııalar men uıymdardyń, qoǵamdyq birlestikterdiń jetekshilerinen, sondaı-aq elimizdiń azamattarynan quttyqtaýlar kelip tústi.
Atap aıtqanda, Sırııa Arab Respýblıkasynyń Prezıdenti Bashar Ál-Asad Nursultan Nazarbaevty prezıdenttik saılaýdaǵy jeńisimen Sırııa halqynyń jáne jeke óziniń atynan quttyqtady.
«Qazaqstan halqynyń Sizdi Prezıdent retinde saılaýdaǵy tańdaýy -turaqtylyq, damý jáne tutastyq baǵdarynyń jalǵasýynyń kórsetkishi, sondaı-aq búkil eldiń Sizge degen seniminiń aıǵaǵy, bul halyqtyń birligin kórsetedi», - delingen quttyqtaýda.
Býtan Koroldiginiń premer-mınıstri Tsherıng Togbeı el halqynyń jáne jeke óziniń atynan Nursultan Nazarbaevty Qazaqstan Prezıdenti laýazymyna qaıta saılanýymen quttyqtady.
«Sizdiń jeńisińiz sońǵy jıyrma jylda qoıylǵan mindetterge ýaqytynda qol jetkizilgendiginiń aıǵaǵy, sondaı-aq halyq tarapynan Sizdiń kóshbasshylyǵyńyzǵa degen senim men qoldaýdyń kórsetkishi», - delingen quttyqtaýda.
T.Togbeı Nursultan Nazarbaevqa sarqylmas qýat, al Qazaqstan halqyna budan ári damýyna jáne órkendeýine tilektestik bildirdi.
BUU azyq-túlik jáne aýyl sharýashylyǵy uıymynyń bas dırektory Joze Gratsıano Da Sılva ózi basqaratyn qurylym men jeke óziniń atynan Nursultan Nazarbaevty memlekettiń joǵarǵy laýazymyna qaıta saılanýymen quttyqtap, myqty densaýlyq jáne mańyzdy qyzmetine tabys, al Qazaqstan halqyna baq-bereke tiledi.
«Jibek jolynyń beıbitshilik syılyǵy» qorynyń ókilderi Nursultan Nazarbaevtyń basshylyǵymen Qazaqstan áleýmettik-ekonomıkalyq damýda tabysqa jetkenin, sonysymen búkil álem nazaryn aýdarǵanyn atap ótken.
«Nursultan Nazarbaev búkil álemde moıyndalǵan kórnekti memleket basshysy bolyp tabylady. Onyń Azııadaǵy ózara is-qımyl jáne senim sharalary keńesin jáne Shanhaı yntymaqtastyq uıymyn qurý jónindegi bastamalary tıisti elder arasyndaǵy dıalog pen konsýltatsııalarǵa, ózara senimdi nyǵaıtýǵa, óńirdegi beıbitshilik pen turaqtylyqty saqtaýǵa qosylǵan qomaqty úles bolyp sanalady. Qazaqstan Nursultan Nazarbaevtyń basshylyǵymen eshqandaı kúmánsiz budan da zor tabystarǵa jetetinine senimdimiz», - dep jazady avtorlar.
AQSh Soltústik Dakota shtatynyń gýbernatory D.Delrımpl Qazaqstanmen yntymaqtastyqtyń kóptegen ortaq baǵyttary bar ekenine toqtalyp, sonyń ishinde aýyl sharýashylyǵy salasyn aıryqsha ataǵan.
D.Delrımpl sondaı-aq Nursultan Nazarbaevqa izgi tilegin joldaı otyryp, Qazaqstan men Soltústik Dakota arasyndaǵy saýda múmkindikteri ári qaraı damı bererinen úmitti ekenin bildirgen.
AQSh senatory D.Hoven ózara yqpaldastyq qarqyny artyp kele jatqanyna nazar aýdarǵan.
«Elderimizdiń arasynda aýyl sharýashylyǵy salasyndaǵy saýda qatynastaryna demeý jasaý óte mańyzdy, soǵan oraı Sizdiń qaıta saılanýyńyzǵa baılanysty men jemisti yntymaqtastyq jumystaryn budan ári jalǵastyrýdy taǵatsyzdana kútemin», - delingen hatta.
Ulybrıtanııa Parlamenti Lordtar palatasynyń múshesi M.Dobbs Nursultan Nazarbaevtyń prezıdenttik saılaýdaǵy jeńisi budan ári de Qazaqstan halqynyń baqýatty ómirin qamtamasyz etip, elimizdiń órkendeýi men jańa jetistikteriniń dáýirin bastaıtynyna degen úmitin bildirgen.
«Sizdiń qaıta saılanýyńyz Sizdiń el men Birikken Koroldik arasynda bekı túsken dostyqty nyǵaıtýǵa septigin tıgizetinine senimdimin», - dep jazady avtor.
Reseı Federatsııasy Prezıdentiniń halyqaralyq mádenı yntymaqtastyq jónindegi arnaýly ókili M.Shvydkoı óz quttyqtaýynda saılaýdaǵy aıqyn jeńis eldiń áleýmettik-ekonomıkalyq ál-aýqatyn nyǵaıtý jáne halyqaralyq bedelin artyrý isindegi Nursultan Nazarbaevtyń eńbegin Qazaqstan halqynyń moıyndaýynyń jarqyn aıǵaǵy ekenin atap ótken.
«Ómirdiń barlyq salasyndaǵy Qazaqstannyń tabystary daý týdyrmaıdy. Respýblıka halyqaralyq gýmanıtarlyq yntymaqtastyq salasynda da barǵan saıyn mańyzdy ári aıqyn ról atqarýda, bul rette ol tól ulttyq dástúrlerin de saqtap otyr», - dep jazady avtor.
«Chalyk Holdıng» kompanııasy dırektorlar keńesiniń tóraǵasy A.Chalyk Nursultan Nazarbaevtyń prezıdent saılaýyndaǵy jeńisiniń eldiń tynyshtyǵy men turaqtylyǵy úshin mańyzdylyǵyn atap ótken.
Sondaı-aq A.Chalyk Nursultan Nazarbaevtyń basshylyǵymen Qazaqstannyń jan-jaqty damyp kele jatqanyna, sonyń arqasynda Ortalyq Azııadaǵy ekonomıkasy eń iri el bolyp otyrǵanyna nazar aýdarypty.
«Fon Rogge qaıyrymdylyq qorynyń» negizin salýshy O.Igals-Rogge Nursultan Nazarbaevty Qazaqstan Prezıdenti laýazymyna saılanýymen quttyqtap, elimizdiń ári qaraı damýyn qamtamasyz etýge baǵyttalǵan jolyn jalǵastyrýyna tilektestik bildirgen.
Birqatar qoǵamdyq qorlardyń basshylary, Almatynyń jas belsendileri, sondaı-aq Qazaqstannyń mádenıet qaıratkerleri óz hattarynda qala jastary atynan Nursultan Nazarbaevty ótken prezıdenttik saılaýdaǵy jeńisimen quttyqtady.
«Qazaqstan halqyna «Nurly jol» atty joldaýyńyzda siz barlyq salany qamtıtyn, sondaı-aq eldiń udaıy damýyn qamtamasyz etetin jańǵyrtý jolyn kórsetetin aýqymdy ózgeristerdi atap berdińiz. Soǵan qarap biz aldymyzda turǵan barlyq mindetterdiń qanshalyqty aýyrlyǵyn sezinemiz. Kez kelgen qazaqstandyq «Máńgilik Eldiń» azamaty bolýǵa laıyq dep senemiz, - delingen hatta.
«Meniń balalyq shaǵymnyń aspany» fılminde bozbala Nursultan rólin oınaǵan E.Álpıev Memleket basshysyn Qazaqstannyń damýyna qosqan úlesi úshin alǵys aıtyp, Prezıdentke myqty densaýlyq, al elimizge beıbitshilik pen tynyshtyq tileıdi.
Nursultan Nazarbaevtyń prezıdent saılaýyndaǵy jeńisine baılanysty quttyqtaýlaryn sondaı-aq Almaty oblysy Qarakemer aýylynan Uly Otan soǵysynyń ardageri K.Qosaqov, Oral qalasynan Ardager muǵalimder keńesiniń tóraǵasy S.Imanǵalıeva, Qaraǵandy oblysy Temirtaý qalasynan V.Homıakova, Qyzylorda qalasynyń turǵyndary H.Qunanqaraev pen S.Shymyrqulov, Jambyl oblysy Sarykemer aýylynan Ó.Ábdireıimov, Jambyl oblysy Úlgili aýylynan E.Serikbaıuly jáne Moıynqum aýyly mektebiniń oqýshysy A.Múslimova, Ońtústik Qazaqstan oblysy Jańa turmys aýylyndaǵy M.Ǵabdýllın atyndaǵy №53 mekteptiń 7 synyp oqýshysy Á.Ulqojaeva, Qaraǵandy oblysy Saran qalasyndaǵy №17 mekteptiń 6 synyp oqýshysy Ú.Serikbaeva, Almaty oblysy Sarqand qalasyndaǵy N.Ostrovskıı atyndaǵy mektep-lıtseıdiń 4 synyp oqýshysy T.Ónerbaeva joldady.
Óleń joldary arqyly órnektelgen ózgeshe tilek-lebiz Almaty qalasynyń turǵyny G.Óteǵalıevadan jáne Almaty oblysy Uzynaǵash aýylyndaǵy S.Berdiqulov atyndaǵy mekteptiń 11 synyp oqýshysy Z.Ysqaqovadan kelip tústi.
Sońǵy aptalarda kelgen hat-habarlarmen muqııat tanysyp shyqqan Memleket basshysy barlyq hattar men jedelhattardyń avtorlaryna quttyqtaýlary úshin shynaıy alǵysyn bildiredi.